kuchh Khaar hi nahin mere daman ke yar hain

kuchh ḳhaar hī nahīñ mire dāman ke yaar haiñ

gardan meñ tauq bhī to laḌakpan ke yaar haiñ

siina ho kushtagān-e-mohabbat kā yā galā

donoñ ye tere ḳhanjar-e-āhan ke yaar haiñ

ḳhātir hamārī kartā hai dair-o-haram meñ kaun

ham to na shaiḳh ke na barahman ke yaar haiñ

kyā pūchhtā hai mujh se nishāñ sail-o-barq kā

donoñ qadīm se mire ḳhirman ke yaar haiñ

kyā garm haiñ ki kahte haiñ ḳhūbān-e-lucknow

london ko jaa.eñ vo jo firañgan ke yaar haiñ

vo dushmanī kareñ to kareñ iḳhtiyār hai

ham to adū ke dost haiñ dushman ke yaar haiñ

kuchh is chaman meñ sabza-e-begāna ham nahīñ

nargis ke dost lāla-o-sausan ke yaar haiñ

kāñTe haiñ jitne vādī-e-ġhurbat ke ai junūñ

sab āstīñ ke jeb ke dāman ke yaar haiñ

gum-gashtagī meñ raah batātā hai ham ko kaun

hai ḳhizr jin kā naam vo rahzan ke yaar haiñ

chalte haiñ shauq-e-barq-e-tajallī meñ kyā hai ḳhauf

chīte tamām vādī-e-aiman ke yaar haiñ

piirī mujhe chhuḌātī hai ahbāb se 'amīr'

dandāñ nahīñ ye mere laḌakpan ke yaar haiñ

kuchh KHar hi nahin mere daman ke yar hain

gardan mein tauq bhi to laDakpan ke yar hain

sina ho kushtagan-e-mohabbat ka ya gala

donon ye tere KHanjar-e-ahan ke yar hain

KHatir hamari karta hai dair-o-haram mein kaun

hum to na shaiKH ke na barahman ke yar hain

kya puchhta hai mujh se nishan sail-o-barq ka

donon qadim se mere KHirman ke yar hain

kya garm hain ki kahte hain KHuban-e-lucknow

london ko jaen wo jo firangan ke yar hain

wo dushmani karen to karen iKHtiyar hai

hum to adu ke dost hain dushman ke yar hain

kuchh is chaman mein sabza-e-begana hum nahin

nargis ke dost lala-o-sausan ke yar hain

kanTe hain jitne wadi-e-ghurbat ke ai junun

sab aastin ke jeb ke daman ke yar hain

gum-gashtagi mein rah batata hai hum ko kaun

hai KHizr jin ka nam wo rahzan ke yar hain

chalte hain shauq-e-barq-e-tajalli mein kya hai KHauf

chite tamam wadi-e-aiman ke yar hain

piri mujhe chhuDati hai ahbab se 'amir'

dandan nahin ye mere laDakpan ke yar hain