کچھ خرابی نہیں مقدر میں

کچھ خرابی نہیں مقدر میں

کوئی مخبر ہے اپنے لشکر میں

میں تو مدت سے غیر حاضر ہوں

بس مرا نام ہے رجسٹر میں

ورنہ اک روز میں ہی سڑ جائیں

لوگ رکھے ہوئے ہیں فریزر میں

یاد کرتی ہیں تجھ کو دیواریں

شکل ابھر آئی ہے پلستر میں

بہ رہی ہے ہماری خاموشی

شور کرتے ہوئے سمندر میں

نیند کی راہ دیکھتے ہوں گے

مخملی جسم نرم بستر میں

ایک بڑھیا کا بوجھ اٹھایا تھا

بس دعائیں تھیں اس کے گٹھر میں

یہ تعارف نئی صدی کا ہے

آئنہ ڈھل رہا ہے پتھر میں

کس قدر سرد یہ مہینہ ہے

دل بھی ٹوٹا مرا دسمبر میں