kuchh munh se dene kah wo bahane se uTh gaya

kuchh muñh se dene kah vo bahāne se uTh gayā

harf-e-saḳhāvat aah zamāne se uTh gayā

hai us ke dekhne kī havas kyā ġhazab ki aah

jo tund-ḳhū Tuk aañkh uThāne se uTh gayā

pūchhī jo us se maiñ dil-e-sad-chāk kī ḳhabar

uljhā ke apnī zulf vo shāne se uTh gayā

kahiyo sabā jo hove guzar yaar kī taraf

dil sab taraf se aap ke jaane se uTh gayā

paayā jo muztarib mujhe mahfil meñ to vahīñ

sharmā ke kuchh vo apne-begāne se uTh gayā

hotā thā apne jaane se jis ko qalaq so haa.e

ghabrā ke aaj kyā mire aane se uTh gayā

hamdam na mujh ko qissa-e-aish-o-tarab sunā

muddat se dil kuchh aise fasāne se uTh gayā

jab tak tū aa.e aa.e ki duniyā hī se koī

le jaan tere der lagāne se uTh gayā

'jur.at' ham is zamīn meñ kahte haiñ aur sher

har-chand jī suḳhan ke baḌhāne se uTh gayā

kuchh munh se dene kah wo bahane se uTh gaya

harf-e-saKHawat aah zamane se uTh gaya

hai us ke dekhne ki hawas kya ghazab ki aah

jo tund-KHu Tuk aankh uThane se uTh gaya

puchhi jo us se main dil-e-sad-chaak ki KHabar

uljha ke apni zulf wo shane se uTh gaya

kahiyo saba jo howe guzar yar ki taraf

dil sab taraf se aap ke jaane se uTh gaya

paya jo muztarib mujhe mahfil mein to wahin

sharma ke kuchh wo apne-begane se uTh gaya

hota tha apne jaane se jis ko qalaq so hae

ghabra ke aaj kya mere aane se uTh gaya

hamdam na mujh ko qissa-e-aish-o-tarab suna

muddat se dil kuchh aise fasane se uTh gaya

jab tak tu aae aae ki duniya hi se koi

le jaan tere der lagane se uTh gaya

'jurat' hum is zamin mein kahte hain aur sher

har-chand ji suKHan ke baDhane se uTh gaya