kuchh na kuchh ki KHwahish mein be-nawa hue hum log

kuchh na kuchh kī ḳhvāhish meñ be-navā hue ham log

lā-ilāj mausam meñ lā-davā hue ham log

ġham-gusār logoñ ne dil ko yuuñ jalā Daalā

be-amān lamhoñ meñ be-ridā hue ham log

muḳhtalif hue kitne iḳhtilāf karne par

qāfile se bichhḌe to jā-ba-jā hue ham log

'nāz' be-yaqīnī ke be-ġhilāf lamhoñ meñ

apnī guuñj meñ chhup kar be-sadā hue ham log

kuchh na kuchh ki KHwahish mein be-nawa hue hum log

la-ilaj mausam mein la-dawa hue hum log

gham-gusar logon ne dil ko yun jala Dala

be-aman lamhon mein be-rida hue hum log

muKHtalif hue kitne iKHtilaf karne par

qafile se bichhDe to ja-ba-ja hue hum log

'naz' be-yaqini ke be-ghilaf lamhon mein

apni gunj mein chhup kar be-sada hue hum log