kuchh nahin aaftab rauzan hai

kuchh nahīñ āftāb rauzan hai

saath vaalā makān raushan hai

ye sitāre chahakte haiñ kitne

āsmāñ kyā kisī kā āñgan hai

chāñdnī hai safīr sūraj kī

chāñd to zulmatoñ kā madfan hai

aag hai kohsār ke nīche

barf to pairahan hai achkan hai

dā.imī zindagī kī hai zāmin

ye fanā jo baqā kī dushman hai

yaad tār-e-nafas pe chiḌiyā hai

vahshatoñ kā shumār dhaḌkan hai

bhīgtā huuñ tumhārī yādoñ meñ

ḳhat tumhārā mujhe to sāvan hai

dekhtā huuñ bichhaḌne vāloñ ko

ḳhvāb goyā ki dūrdarshan hai

naḳhl-e-gul ho kisī kā mujh ko kyā

mujh ko to ḳhār-o-ḳhas hī gulshan hai

tak rahā huuñ jahāñ ko hairat se

mujh meñ jaagā ye kaisā bachpan hai

aap mujh ko hī DhūñDte hoñge

sab se patlī mirī hī gardan hai

hañs diye merī baat sun kar vo

muskurā kar kahā ki bachpan hai

'ahmad' apnī misāl aap huuñ maiñ

haañ mirā sher merā darpan hai

kuchh nahin aaftab rauzan hai

sath wala makan raushan hai

ye sitare chahakte hain kitne

aasman kya kisi ka aangan hai

chandni hai safir suraj ki

chand to zulmaton ka madfan hai

aag hai kohsar ke niche

barf to pairahan hai achkan hai

daimi zindagi ki hai zamin

ye fana jo baqa ki dushman hai

yaad tar-e-nafas pe chiDiya hai

wahshaton ka shumar dhaDkan hai

bhigta hun tumhaari yaadon mein

KHat tumhaara mujhe to sawan hai

dekhta hun bichhaDne walon ko

KHwab goya ki durdarshan hai

naKHl-e-gul ho kisi ka mujh ko kya

mujh ko to KHar-o-KHas hi gulshan hai

tak raha hun jahan ko hairat se

mujh mein jaga ye kaisa bachpan hai

aap mujh ko hi DhunDte honge

sab se patli meri hi gardan hai

hans diye meri baat sun kar wo

muskura kar kaha ki bachpan hai

'ahmad' apni misal aap hun main

han mera sher mera darpan hai