kuchh nahin hasil sipar ko chir ko ya talwar toD

kuchh nahīñ hāsil sipar ko chiir ko yā talvār toḌ

hai agar tāqat to mere āñsuoñ kā taar toḌ

terī chashm o zulf se saudā-e-ham-chashmī kiyā

ai sanam bādām-e-chashm-e-āhū-e-tātār toḌ

zulf meñ motī pironā mere haq meñ zahr hai

aaj ai mashshāta-e-dandāñ dahān-e-yār toḌ

silsila gabr-o-musalmāñ kī adāvat kā miTā

ai parī be-parda ho kar sub.ha-o-zunnār toḌ

kibr bhī hai shirk ai zāhid muvahhid ke huzūr

le ke tesha ḳhāksārī kā but-e-pindār toḌ

āb-e-gauhar se badan kī aab hotī hai ḳharāb

bojh hai ai nāznīñ ye motiyoñ kā haar toḌ

sharm kab tak ai parī lā haath kar iqrār-e-vasl

apne dil ko saḳht kar ke rishta-e-inkār toḌ

sabr kab tak raah paidā ho ki ai dil jaan jaa.e

ek Takkar maar kar sar phoḌ yā dīvār toḌ

ai zuleḳhā naqd-e-jāñ ham deñ lagā tū gañj-e-zar

qīmat-e-yūsuf kā ho jaa.e sar-e-bāzār toḌ

vasf-e-chashm-e-yār likhne ke liye ai dast-e-shauq

chal kisī gulshan meñ shāḳh-e-nargis-e-bīmār toḌ

chaḌh ke koThe par dikhā de apne abrū meñ shikan

ai parī-paikar halāk-e-charḳh kī talvār toḌ

aa.ina hai māne-e-nazzāra-e-husn-o-jamāl

ho sake to sadd-e-askandar ko ai dildār toḌ

māne-e-mastī ko bad-mastī dikhānā chāhiye

mohtasib kā shīsha-e-dil ai bu-e-mai-ḳhvār toḌ

husn-e-peshānī se qasr-e-charḳh ko barbād kar

lauh-e-qur.āñ se tilism-e-gumbad-e-davvār toḌ

naam ko ai dil na rakh asbāb-e-islāh-e-junūñ

vādī-e-vahshat meñ chal kar nashtar-e-har-ḳhār toḌ

āñkheñ phoḌ us kī jo dekhe be-ijāzat muñh tirā

shauq se ai mast jām-e-sharbat-e-dīdār toḌ

ishq-e-zulf-e-ambar-afshāñ kā na TuuTe silsila

paañv kī zanjīr ai dast-e-junūñ sau baar toḌ

sā.il-e-bosa haiñ un ko dekh chashm-e-qahr se

aañkh ke Dheloñ se ai but ḳhātir-e-aġhyār toḌ

husn-e-ġham meñ ek muddat se muqayyad hai 'munīr'

fikr-e-duniyā kā hisār ai haidar-e-karrār toḌ

kuchh nahin hasil sipar ko chir ko ya talwar toD

hai agar taqat to mere aansuon ka tar toD

teri chashm o zulf se sauda-e-ham-chashmi kiya

ai sanam baadam-e-chashm-e-ahu-e-tatar toD

zulf mein moti pirona mere haq mein zahr hai

aaj ai mashshata-e-dandan dahan-e-yar toD

silsila gabr-o-musalman ki adawat ka miTa

ai pari be-parda ho kar subha-o-zunnar toD

kibr bhi hai shirk ai zahid muwahhid ke huzur

le ke tesha KHaksari ka but-e-pindar toD

aab-e-gauhar se badan ki aab hoti hai KHarab

bojh hai ai naznin ye motiyon ka haar toD

sharm kab tak ai pari la hath kar iqrar-e-wasl

apne dil ko saKHt kar ke rishta-e-inkar toD

sabr kab tak rah paida ho ki ai dil jaan jae

ek Takkar mar kar sar phoD ya diwar toD

ai zuleKHa naqd-e-jaan hum den laga tu ganj-e-zar

qimat-e-yusuf ka ho jae sar-e-bazar toD

wasf-e-chashm-e-yar likhne ke liye ai dast-e-shauq

chal kisi gulshan mein shaKH-e-nargis-e-bimar toD

chaDh ke koThe par dikha de apne abru mein shikan

ai pari-paikar halak-e-charKH ki talwar toD

aaina hai mane-e-nazzara-e-husn-o-jamal

ho sake to sadd-e-askandar ko ai dildar toD

mane-e-masti ko bad-masti dikhana chahiye

mohtasib ka shisha-e-dil ai bu-e-mai-KHwar toD

husn-e-peshani se qasr-e-charKH ko barbaad kar

lauh-e-quran se tilism-e-gumbad-e-dawwar toD

nam ko ai dil na rakh asbab-e-islah-e-junun

wadi-e-wahshat mein chal kar nashtar-e-har-KHar toD

aankhen phoD us ki jo dekhe be-ijazat munh tera

shauq se ai mast jam-e-sharbat-e-didar toD

ishq-e-zulf-e-ambar-afshan ka na TuTe silsila

panw ki zanjir ai dast-e-junun sau bar toD

sail-e-bosa hain un ko dekh chashm-e-qahr se

aankh ke Dhelon se ai but KHatir-e-aghyar toD

husn-e-gham mein ek muddat se muqayyad hai 'munir'

fikr-e-duniya ka hisar ai haidar-e-karrar toD