kuchh sarguzisht kah na sake ru-ba-ru qalam

kuchh sarguzisht kah na sake rū-ba-rū qalam

gardish-nasīb roz-e-azal se hai tū qalam

kāġhaz kā taao kyā hai tire rū-ba-rū qalam

aisā hī ya.anī piir kā neza hai tū qalam

zālim nahīñ tū harf-e-mohabbat se āshnā

mashq-e-sitam se sharm kar ai jañg-jū qalam

kyā ḳhāma likh sake sifat-e-zulf-e-mushk-bār

shore ke bhī hue haiñ kahīñ mushk-bū qalam

naama par-e-humā ho mirā ai shah-e-butāñ

likho gar ustuḳhāñ se banā kar kabhū qalam

qātil ko maiñ ne ḳhat nahīñ shanjarf se likhā

kis vaj.h se huā hai tū ab surḳh-rū qalam

ya.anī ki us ke ishq meñ is dam milā hai yaañ

muñh se lahū lagā ke shahīdoñ meñ tū qalam

likh aur ik ġhazal ki shagufta zamīn hai

le kar 'nasīr' ab ye lab-e-ābjū qalam

kuchh sarguzisht kah na sake ru-ba-ru qalam

gardish-nasib roz-e-azal se hai tu qalam

kaghaz ka tao kya hai tere ru-ba-ru qalam

aisa hi yani pir ka neza hai tu qalam

zalim nahin tu harf-e-mohabbat se aashna

mashq-e-sitam se sharm kar ai jang-ju qalam

kya KHama likh sake sifat-e-zulf-e-mushk-bar

shore ke bhi hue hain kahin mushk-bu qalam

nama par-e-huma ho mera ai shah-e-butan

likho gar ustuKHan se bana kar kabhu qalam

qatil ko main ne KHat nahin shanjarf se likha

kis wajh se hua hai tu ab surKH-ru qalam

yani ki us ke ishq mein is dam mila hai yan

munh se lahu laga ke shahidon mein tu qalam

likh aur ek ghazal ki shagufta zamin hai

le kar 'nasir' ab ye lab-e-abju qalam