kuchh soch ke izhaar-e-KHayalat na karna

kuchh soch ke iz.hār-e-ḳhayālāt na karnā

har baat ko sunñā vo tirā baat na karnā

aisā na ho dar-asl tumheñ apnā samajh leñ

is darja ġharīboñ kī mudārāt na karnā

hai farq marātib ke liye saarā zamāna

maiḳhāne meñ tauhīn-e-musāvāt na karnā

ik farz hai tāzīm-e-ravāyāt ba-har-taur

ik farz hai tarmīm-e-rivāyāt na karnā

paimāna-ba-kaf jab ho javānī kī hikāyat

is baab meñ sanjīda savālāt na karnā

ik baar tavajjoh se koī baat to sun lo

phir chāhe kabhī ham se mulāqāt na karnā

āsān hai jaañ denā kisī baat pe 'nūrī'

dushvār hai iz.hār-e-ḳhayālāt na karnā

kuchh soch ke izhaar-e-KHayalat na karna

har baat ko sunna wo tera baat na karna

aisa na ho dar-asl tumhein apna samajh len

is darja gharibon ki mudaraat na karna

hai farq maraatib ke liye sara zamana

maiKHane mein tauhin-e-musawat na karna

ek farz hai tazim-e-rawayat ba-har-taur

ek farz hai tarmim-e-riwayat na karna

paimana-ba-kaf jab ho jawani ki hikayat

is bab mein sanjida sawalat na karna

ek bar tawajjoh se koi baat to sun lo

phir chahe kabhi hum se mulaqat na karna

aasan hai jaan dena kisi baat pe 'nuri'

dushwar hai izhaar-e-KHayalat na karna