kuchh sochon ke kuchh fikron ke kuchh the ehsasat ke nam

kuchh sochoñ ke kuchh fikroñ ke kuchh the ehsāsāt ke naam

jitne bhī patthar aa.e sab ā.īna-e-jazbāt ke naam

un kī nigāheñ be-parvā haiñ kuchh bhī nahīñ jazbāt ke naam

vaqf kiye haiñ jin logoñ ne din ke ujāle raat ke naam

tapte hue sahrā meñ jaise shabnam kī be-rañg numūd

jaane kitne ḳhat likkhe haiñ maiñ ne bhī barsāt ke naam

vaqt ke hoñToñ pe raqsāñ haiñ mastī kā ik raag liye

sub.h-e-qayāmat ke hañgāme husn-e-maujūdāt ke naam

mauj-e-sukūñ ke saath mile zanjīr-e-alam be-tābī-e-dil

ham ne kitnī daulat paa.ī ulfat kī sauġhāt ke naam

un kī tamannā merī koshish bāham va.ade aur qasmeñ

kuchh merī taqdīr ke sadqe baaqī sab hālāt ke naam

sajī huī hai adab kī mahfil haal ke aise naġhmoñ se

be-maqsad be-kaif kitābeñ husn-e-taḳhlīqāt ke naam

hasrat-o-armāñ bazm-e-tasavvur dāman-e-sahrā dast-e-junūñ

ḳhushiyoñ ke paiġhām haiñ 'ḳhālid' ġham ke hasīñ lamhāt ke naam

kuchh sochon ke kuchh fikron ke kuchh the ehsasat ke nam

jitne bhi patthar aae sab aaina-e-jazbaat ke nam

un ki nigahen be-parwa hain kuchh bhi nahin jazbaat ke nam

waqf kiye hain jin logon ne din ke ujale raat ke nam

tapte hue sahra mein jaise shabnam ki be-rang numud

jaane kitne KHat likkhe hain main ne bhi barsat ke nam

waqt ke honTon pe raqsan hain masti ka ek rag liye

subh-e-qayamat ke hangame husn-e-maujudat ke nam

mauj-e-sukun ke sath mile zanjir-e-alam be-tabi-e-dil

hum ne kitni daulat pai ulfat ki saughat ke nam

un ki tamanna meri koshish baham wade aur qasmen

kuchh meri taqdir ke sadqe baqi sab haalat ke nam

saji hui hai adab ki mahfil haal ke aise naghmon se

be-maqsad be-kaif kitaben husn-e-taKHliqat ke nam

hasrat-o-arman bazm-e-tasawwur daman-e-sahra dast-e-junun

KHushiyon ke paigham hain 'KHalid' gham ke hasin lamhat ke nam