kuchh to gham-KHana-e-hasti mein ujala hota

kuchh to ġham-ḳhāna-e-hastī meñ ujālā hotā

chāñd chamkā hai to ehsās bhī chamkā hotā

ā.īna-ḳhāna-e-ālam meñ khaḌā sochtā huuñ

maiñ na hotā to yahāñ kaun sā chehra hotā

ḳhud bhī gum ho ga.e ham apnī sadāoñ kī tarah

dasht-e-furqat meñ tujhe yuuñ na pukārā hotā

husn-e-iz.hār ne ra.anā.ī atā kī ġham ko

gul agar rañg na hotā to sharāra hotā

ham bhī ehsās kī tasvīr banā sakte the

kaash ham pe kabhī iz.hār kā dar vā hotā

fursat-e-shauq na dī karb-e-vafā ne ronā

koī e.ajāz to ham ne bhī dikhāyā hotā

ham ko pahchān ki ai bazm-e-chaman-zār-e-vajūd

ham na hote to tujhe kis ne sañvārā hotā

ek sūrat se huā naqsh-e-do-ālam ko faroġh

ā.īna TuuT na jaatā to tamāshā hotā

ham ne har ḳhvāb ko ta.abīr atā kī 'aslam'

varna mumkin thā ki har naqsh adhūrā hotā

kuchh to gham-KHana-e-hasti mein ujala hota

chand chamka hai to ehsas bhi chamka hota

aaina-KHana-e-alam mein khaDa sochta hun

main na hota to yahan kaun sa chehra hota

KHud bhi gum ho gae hum apni sadaon ki tarah

dasht-e-furqat mein tujhe yun na pukara hota

husn-e-izhaar ne ranai ata ki gham ko

gul agar rang na hota to sharara hota

hum bhi ehsas ki taswir bana sakte the

kash hum pe kabhi izhaar ka dar wa hota

fursat-e-shauq na di karb-e-wafa ne rona

koi eajaz to hum ne bhi dikhaya hota

hum ko pahchan ki ai bazm-e-chaman-zar-e-wajud

hum na hote to tujhe kis ne sanwara hota

ek surat se hua naqsh-e-do-alam ko farogh

aaina TuT na jata to tamasha hota

hum ne har KHwab ko tabir ata ki 'aslam'

warna mumkin tha ki har naqsh adhura hota