kuchh to rangini-e-afkar khule

kuchh to rangīni-e-afkār khule

'saif' chal matla-e-anvār khule

barg-e-gul jaise havā ke ruḳh par

kis latāfat se lab-e-yār khule

tū zarā band-e-qabā khol to de

jauhar-e-nāfa-e-tātār khule

dekh ai kūcha-e-jānāñ kī havā

dil ke darvāze ka.ī baar khule

zaḳhm-e-dil ham ne chhupā.e varna

terī āñkhoñ ne kiye vaar khule

vaah kyā Dhañg haiñ sayyādoñ ke

log phirte haiñ giraftār khule

kyā isī tarah guzar jā.egī

kuchh to un par bhī dil-e-zār khule

hasrat-e-dīd pas-e-marg na pūchh

rah ga.e dīda-e-bedār khule

lab-e-ḳhāmosh ko vā kar zālim

ye hai iqrār ki inkār khule

saaf baḳhshe ga.e vo hashr ke din

jo nazar aa.e gunahgār khule

ka.abe jā kar bhī hameñ kashf huā

but-kade meñ bhī kuchh asrār khule

ham bhī qismat kā likhā dekheñge

'saif' chal nāma-e-dildār khule

kuchh to rangini-e-afkar khule

'saif' chal matla-e-anwar khule

barg-e-gul jaise hawa ke ruKH par

kis latafat se lab-e-yar khule

tu zara band-e-qaba khol to de

jauhar-e-nafa-e-tatar khule

dekh ai kucha-e-jaanan ki hawa

dil ke darwaze kai bar khule

zaKHm-e-dil hum ne chhupae warna

teri aankhon ne kiye war khule

wah kya Dhang hain sayyaadon ke

log phirte hain giraftar khule

kya isi tarah guzar jaegi

kuchh to un par bhi dil-e-zar khule

hasrat-e-did pas-e-marg na puchh

rah gae dida-e-bedar khule

lab-e-KHamosh ko wa kar zalim

ye hai iqrar ki inkar khule

saf baKHshe gae wo hashr ke din

jo nazar aae gunahgar khule

kabe ja kar bhi hamein kashf hua

but-kade mein bhi kuchh asrar khule

hum bhi qismat ka likha dekhenge

'saif' chal nama-e-dildar khule