kuchh usulon ka nasha tha kuchh muqaddas KHwab the

kuchh usūloñ kā nasha thā kuchh muqaddas ḳhvāb the

har zamāne meñ shahādat ke yahī asbāb the

koh se nīche utar kar kankarī chunte haiñ ab

ishq meñ jo aabjū the jang meñ sailāb the

sāz-o-sāmāñ the zafar ke par vo shab meñ luT ga.e

ḳhāk-o-ḳhūñ ke darmiyāñ kuchh ḳhvāb kuchh kam-ḳhvāb the

kyā dam-e-ruḳhsat nazar aate ḳhutūt-e-dilbarī

naqsh the us chāñd ke lekin ba-shakl-e-āb the

maiñ adū kī justujū meñ thā ki ik patthar lagā

muḌ ke dekhā to sināñ taane hue ahbāb the

the bahut nāyāb vo nūr-e-qalam zor-e-bayāñ

sho.ala uTThā jab junūñ kā phir vahī nāyāb the

kyā 'firāq'-o-'faiz' se lenā thā mujh ko ai 'na.īm'

mere aage fikr-o-fan ke kuchh na.e ādāb the

kuchh usulon ka nasha tha kuchh muqaddas KHwab the

har zamane mein shahadat ke yahi asbab the

koh se niche utar kar kankari chunte hain ab

ishq mein jo aabju the jang mein sailab the

saz-o-saman the zafar ke par wo shab mein luT gae

KHak-o-KHun ke darmiyan kuchh KHwab kuchh kam-KHwab the

kya dam-e-ruKHsat nazar aate KHutut-e-dilbari

naqsh the us chand ke lekin ba-shakl-e-ab the

main adu ki justuju mein tha ki ek patthar laga

muD ke dekha to sinan tane hue ahbab the

the bahut nayab wo nur-e-qalam zor-e-bayan

shoala uTTha jab junun ka phir wahi nayab the

kya 'firaq'-o-'faiz' se lena tha mujh ko ai 'naim'

mere aage fikr-o-fan ke kuchh nae aadab the