kudurat se ghubar-aluda aaina nahin rahta

kudūrat se ġhubār-ālūda ā.īna nahīñ rahtā

mire chehre pe koī dūsrā chehra nahīñ rahtā

ġhamoñ kī dhuup se chehre vahāñ murjhā.e rahte haiñ

tirī zulf-e-mo.ambar kā jahāñ saaya nahīñ rahtā

koī manzar bhī ho afsurda afsurda sā lagtā hai

tasavvur meñ kisī kā jab ruḳh-e-zebā nahīñ rahtā

dar-o-dīvār se ye kaisī vīrānī Tapaktī hai

tirī bastī meñ dīvāne kā ab charchā nahīñ rahtā

halāk-e-kārobār-e-ġham bhī rah kar ai 'nazar' ḳhush huuñ

laboñ par gardish-e-taqdīr kā shikva nahīñ rahtā

kudurat se ghubar-aluda aaina nahin rahta

mere chehre pe koi dusra chehra nahin rahta

ghamon ki dhup se chehre wahan murjhae rahte hain

teri zulf-e-moambar ka jahan saya nahin rahta

koi manzar bhi ho afsurda afsurda sa lagta hai

tasawwur mein kisi ka jab ruKH-e-zeba nahin rahta

dar-o-diwar se ye kaisi virani Tapakti hai

teri basti mein diwane ka ab charcha nahin rahta

halak-e-karobar-e-gham bhi rah kar ai 'nazar' KHush hun

labon par gardish-e-taqdir ka shikwa nahin rahta