kufr se ye jo munawwar meri peshani hai

kufr se ye jo munavvar mirī peshānī hai

zāhir is se bhī mirā jazba-e-īmānī hai

ye jo yaksūī mayassar hai mujhe shaam o sahar

sar-ba-sar mere liye vaj.h-e-pareshānī hai

is kināre pe faqat maiñ huuñ akelā ḳhālī

nahr ke dūsrī jānib mirī hairānī hai

ḳhaak uḌtī hai to har-sū mire andar varna

jis taraf maiñ huuñ vahāñ chāroñ taraf paanī hai

jo siyah-fām hai andar kī taraf se jitnā

us ke chehre pe yahāñ utnī hī tābānī hai

mausamoñ se abhī māyūs nahīñ huuñ yaksar

ik havā hai jo abhī merī taraf aanī hai

dil meñ kyā sūrat-e-hālāt hai khultā nahīñ kuchh

kyā kamī hai yahāñ kis shai kī farāvānī hai

ye ajab tarha kā bāzār-e-suḳhan hai ki jahāñ

maiñ hī nāyāb huuñ aur merī hī arzānī hai

āzmā.ish meñ hī rakhtā huuñ sadā ḳhud ko 'zafar'

merī mushkil hī sarāsar mirī āsānī hai

kufr se ye jo munawwar meri peshani hai

zahir is se bhi mera jazba-e-imani hai

ye jo yaksui mayassar hai mujhe sham o sahar

sar-ba-sar mere liye wajh-e-pareshani hai

is kinare pe faqat main hun akela KHali

nahr ke dusri jaanib meri hairani hai

KHak uDti hai to har-su mere andar warna

jis taraf main hun wahan chaaron taraf pani hai

jo siyah-fam hai andar ki taraf se jitna

us ke chehre pe yahan utni hi tabani hai

mausamon se abhi mayus nahin hun yaksar

ek hawa hai jo abhi meri taraf aani hai

dil mein kya surat-e-haalat hai khulta nahin kuchh

kya kami hai yahan kis shai ki farawani hai

ye ajab tarha ka bazar-e-suKHan hai ki jahan

main hi nayab hun aur meri hi arzani hai

aazmaish mein hi rakhta hun sada KHud ko 'zafar'

meri mushkil hi sarasar meri aasani hai