kuja hasti bata de tu kahan hai

kujā hastī batā de tū kahāñ hai

jise kahte haiñ bismil nīm-jāñ hai

hamārā ghar hai ya.anī ḳhāna-e-māst

mahal hī kaaḳh hai koshak makāñ hai

chachā am hai pisar beTā pidar baap

to kumba ḳhānumān-o-dūdamāñ hai

safīna naav kashtī baan mallāh

bahe paanī to vo āb-e-ravāñ hai

batāo aag kyā hai nār-o-ātish

dhuāñ kyā chiiz hai do-dūd-o-ḳhāñ hai

jise kahte ho tum gardūn-e-gardāñ

falak charḳh-o-sip.har-o-āsmāñ hai

vahī jannat ki jis kī aarzū hai

na.īm-o-ḳhuld-o-firdaus-o-jināñ hai

sunā kījiye hikāyat hai kahānī

kahā kījiye fasāna dāstāñ hai

mirā sar raas hai māthā jabīñ hai

mire muñh meñ zabāñ hai jo lisāñ hai

kaho tum jo tarāzū hai so mīzāñ

suno tum āzmā.ish imtihāñ hai

hajar patthar hai aur qirtās kāġhaz

subuk halkā hai aur bhārī girāñ hai

asā lāThī alam neza sināñ bhaal

jise ham qaus kahte haiñ kamāñ hai

nihān-o-musatatar poshīda maḳhfī

jo bāriz hai to zāhir hai ayaañ hai

agar jaano ho tum revaḌ ko galla

to charvāhā bhī raa.ī aur shabāñ hai

kahā karte haiñ shā.ir ko suḳhan-dāñ

jo bhedī hai to mahram rāzdāñ hai

humānjā āmdam jaa.e ki hastī

vahīñ aayā huuñ maiñ bhī tū jahāñ hai

yahī kaun-o-makāñ duniyā hai aalam

ye hī getī hī gīhāñ hai jahāñ hai

kuja hasti bata de tu kahan hai

jise kahte hain bismil nim-jaan hai

hamara ghar hai yani KHana-e-mast

mahal hi kaKH hai koshak makan hai

chacha am hai pisar beTa pidar bap

to kumba KHanuman-o-dudaman hai

safina naw kashti ban mallah

bahe pani to wo aab-e-rawan hai

batao aag kya hai nar-o-atish

dhuan kya chiz hai do-dud-o-KHan hai

jise kahte ho tum gardun-e-gardan

falak charKH-o-siphar-o-asman hai

wahi jannat ki jis ki aarzu hai

naim-o-KHuld-o-firdaus-o-jinan hai

suna kijiye hikayat hai kahani

kaha kijiye fasana dastan hai

mera sar ras hai matha jabin hai

mere munh mein zaban hai jo lisan hai

kaho tum jo taraazu hai so mizan

suno tum aazmaish imtihan hai

hajar patthar hai aur qirtas kaghaz

subuk halka hai aur bhaari giran hai

asa laThi alam neza sinan bhaal

jise hum qaus kahte hain kaman hai

nihan-o-musatatar poshida maKHfi

jo bariz hai to zahir hai ayan hai

agar jaano ho tum rewaD ko galla

to charwaha bhi rai aur shaban hai

kaha karte hain shair ko suKHan-dan

jo bhedi hai to mahram raazdan hai

humanja aamdam jae ki hasti

wahin aaya hun main bhi tu jahan hai

yahi kaun-o-makan duniya hai aalam

ye hi geti hi gihan hai jahan hai