kunj-e-tanhai basae hijr ki lazzat mein hun

kunj-e-tanhā.ī basā.e hijr kī lazzat meñ huuñ

sab se dāman jhaaḌ kar bas ik tirī chāhat meñ huuñ

kaun sā saudā hai sar meñ kis ke qaabū meñ hai dil

har qadam sahrāoñ meñ hai har ghaḌī vahshat meñ huuñ

maiñ anāoñ kā thā parvarda to phir dast-e-savāl

kis tarah phailā kisī ke sāmne hairat meñ huuñ

ye bhī kyā bechārgī hai kāġhzī shādābiyāñ

apne chehre par sajā.e hajla-e-ġhairat meñ huuñ

ek ḳhvāhish ke hazāroñ rañg umr-e-muḳhtasar

kuchh bhī kar paatā nahīñ maiñ is qadar ujlat meñ huuñ

ai mire ghar! ab to mujh ko khīñch le apnī taraf

aur kitnī der maiñ is arsa-e-hijrat meñ huuñ

kunj-e-tanhai basae hijr ki lazzat mein hun

sab se daman jhaD kar bas ek teri chahat mein hun

kaun sa sauda hai sar mein kis ke qabu mein hai dil

har qadam sahraon mein hai har ghaDi wahshat mein hun

main anaon ka tha parwarda to phir dast-e-sawal

kis tarah phaila kisi ke samne hairat mein hun

ye bhi kya bechaargi hai kaghzi shadabiyan

apne chehre par sajae hajla-e-ghairat mein hun

ek KHwahish ke hazaron rang umr-e-muKHtasar

kuchh bhi kar pata nahin main is qadar ujlat mein hun

ai mere ghar! ab to mujh ko khinch le apni taraf

aur kitni der main is arsa-e-hijrat mein hun