ku-ba-ku hota nahin ya dar-ba-dar hota nahin

kū-ba-kū hotā nahīñ yā dar-ba-dar hotā nahīñ

ḳhūn-e-nāhaq kis taraf shām-o-sahar hotā nahīñ

har shajar ai dīda-e-tar bārvar hotā nahīñ

har sadaf kī god meñ jaise guhar hotā nahīñ

sunte aa.e haiñ ki shar kā badla shar hotā nahīñ

āj-kal ke daur meñ aisā magar hotā nahīñ

hai mirā honā na honā us parinde kī tarah

ek par hotā hai jis kā ek par hotā nahīñ

tere dīvāne ko dekhā hai hamesha sar-ba-kaf

tere dīvāne kā dil hotā hai sar hotā nahīñ

āj-kal kyā kuchh nahīñ hotā ḳhudā ke naam par

āj-kal kyā kuchh ḳhudā ke naam par hotā nahīñ

mohtaram qānūn-sāzo ye bhī kyā qānūn hai

ek bhī qānūn aa.ed aap par hotā nahīñ

ku-ba-ku hota nahin ya dar-ba-dar hota nahin

KHun-e-nahaq kis taraf sham-o-sahar hota nahin

har shajar ai dida-e-tar barwar hota nahin

har sadaf ki god mein jaise guhar hota nahin

sunte aae hain ki shar ka badla shar hota nahin

aaj-kal ke daur mein aisa magar hota nahin

hai mera hona na hona us parinde ki tarah

ek par hota hai jis ka ek par hota nahin

tere diwane ko dekha hai hamesha sar-ba-kaf

tere diwane ka dil hota hai sar hota nahin

aaj-kal kya kuchh nahin hota KHuda ke nam par

aaj-kal kya kuchh KHuda ke nam par hota nahin

mohtaram qanun-sazo ye bhi kya qanun hai

ek bhi qanun aaed aap par hota nahin