ku-ba-ku kab se hai ek sarsar-e-gham aawara

kū-ba-kū kab se hai ik sarsar-e-ġham āvāra

ab kidhar jaa.eñ tire shahr meñ ham āvāra

kyā faqīhān-e-haram ko ye ḳhabar hai yaaro

ham ko rakhte haiñ ġhazālān-e-haram āvāra

surḳh-rū 'ahd-e-vafā se na huā ho farhād

bū-e-ḳhūñ hai jo sar-e-ḳhalvat-e-jam āvāra

ham chale aa.e to but-ḳhāne pe kyā kyā guzrī

barhaman sar-ba-garebāñ hai sanam āvāra

sar-nigūñ haiñ mire fitrāk-e-ġhazal meñ vo ġhazāl

jin ko rakhtī thī kabhī lazzat-e-ram āvāra

surḳhī-e-ḳhār-e-muġhīlāñ kabhī aisī to na thī

aaj guzre haiñ ye kis raah se ham āvāra

zulf-e-āvāra uḌā le ga.ī dil ko bhī 'salīm'

varna pahle vo javāñ-marg thā kam āvāra

ku-ba-ku kab se hai ek sarsar-e-gham aawara

ab kidhar jaen tere shahr mein hum aawara

kya faqihan-e-haram ko ye KHabar hai yaro

hum ko rakhte hain ghazalan-e-haram aawara

surKH-ru 'ahd-e-wafa se na hua ho farhad

bu-e-KHun hai jo sar-e-KHalwat-e-jam aawara

hum chale aae to but-KHane pe kya kya guzri

barhaman sar-ba-gareban hai sanam aawara

sar-nigun hain mere fitrak-e-ghazal mein wo ghazal

jin ko rakhti thi kabhi lazzat-e-ram aawara

surKHi-e-KHar-e-mughilan kabhi aisi to na thi

aaj guzre hain ye kis rah se hum aawara

zulf-e-awara uDa le gai dil ko bhi 'salim'

warna pahle wo jawan-marg tha kam aawara