ku-e-qatil hai magar jaane ko ji chahe hai

kū-e-qātil hai magar jaane ko jī chāhe hai

ab to kuchh faisla kar jaane ko jī chāhe hai

log apne dar-o-dīvār se hoshiyār raheñ

aaj dīvāne kā ghar jaane ko jī chāhe hai

dard aisā hai ki jī chāhe hai zinda rahiye

zindagī aisī ki mar jaane ko jī chāhe hai

dil ko zaḳhmoñ ke sivā kuchh na diyā phūloñ ne

ab to kāñToñ meñ utar jaane ko jī chāhe hai

chhāñv va.adoñ kī hai bas dhokā hī dhokā ai dil

mat Thahar garche Thahar jaane ko jī chāhe hai

zindagī meñ hai vo uljhan ki pareshāñ ho kar

zulf kī tarah bikhar jaane ko jī chāhe hai

qatl karne kī adā bhī hasīñ qātil bhī hasīñ

na bhī marnā ho to mar jaane ko jī chāhe hai

jī ye chāhe hai ki pūchhūñ kabhī un zulfoñ se

kyā tumhārā bhī sañvar jaane ko jī chāhe hai

rasan-o-dār idhar kākul-o-ruḳhsār udhar

dil batā terā kidhar jaane ko jī chāhe hai

ku-e-qatil hai magar jaane ko ji chahe hai

ab to kuchh faisla kar jaane ko ji chahe hai

log apne dar-o-diwar se hoshiyar rahen

aaj diwane ka ghar jaane ko ji chahe hai

dard aisa hai ki ji chahe hai zinda rahiye

zindagi aisi ki mar jaane ko ji chahe hai

dil ko zaKHmon ke siwa kuchh na diya phulon ne

ab to kanTon mein utar jaane ko ji chahe hai

chhanw wadon ki hai bas dhoka hi dhoka ai dil

mat Thahar garche Thahar jaane ko ji chahe hai

zindagi mein hai wo uljhan ki pareshan ho kar

zulf ki tarah bikhar jaane ko ji chahe hai

qatl karne ki ada bhi hasin qatil bhi hasin

na bhi marna ho to mar jaane ko ji chahe hai

ji ye chahe hai ki puchhun kabhi un zulfon se

kya tumhaara bhi sanwar jaane ko ji chahe hai

rasan-o-dar idhar kakul-o-ruKHsar udhar

dil bata tera kidhar jaane ko ji chahe hai