kya aabru rahe jo gham-e-dil ka dar khule

kyā aabrū rahe jo ġham-e-dil kā dar khule

kyoñ rū-barū jahāñ ke mirī chashm-e-tar khule

nargis se bostāñ meñ ishāre huā kiye

ahl-e-nazar ko dekh ke ahl-e-nazar khule

shor-o-shaġhaf ne dahr ke ḳhāmosh kar diyā

insāñ agar khule bhī to kis baat par khule

piine ko yuuñ to shaiḳh bhī tayyār haiñ magar

kahte haiñ shart ye hai girah se na zar khule

bazm-e-tarab meñ dekh lī raunaq majāz kī

pur ma.arifat se ho ab agar chashm-e-tar khule

kyā pattharoñ pe la.al-o-javāhar bikheriye

kyoñ sāmne sanam ke mirī chashm-e-tar khule

har aadmī ko 'soz' hai nān-o-namak se kaam

duniyā meñ ḳhaak jauhar-e-ahl-e-hunar khule

kya aabru rahe jo gham-e-dil ka dar khule

kyon ru-baru jahan ke meri chashm-e-tar khule

nargis se bostan mein ishaare hua kiye

ahl-e-nazar ko dekh ke ahl-e-nazar khule

shor-o-shaghaf ne dahr ke KHamosh kar diya

insan agar khule bhi to kis baat par khule

pine ko yun to shaiKH bhi tayyar hain magar

kahte hain shart ye hai girah se na zar khule

bazm-e-tarab mein dekh li raunaq majaz ki

pur marifat se ho ab agar chashm-e-tar khule

kya pattharon pe lal-o-jawahar bikheriye

kyon samne sanam ke meri chashm-e-tar khule

har aadmi ko 'soz' hai nan-o-namak se kaam

duniya mein KHak jauhar-e-ahl-e-hunar khule