kya ada kya naz hai kya aan hai

kyā adā kyā naaz hai kyā aan hai

yaañ parī kā husn bhī hairān hai

huur bhī dekhe to ho jaave fidā

aaj is aalam kā vo insān hai

us ke rang-e-sabz kī hai chiiñ meñ dhuum

kyuuñ na ho āḳhir ko hindostān hai

jān-o-dil ham nazr ko laa.e haiñ aaj

lījiye ye dil hai aur ye jaan hai

dil bhī hai dil se tasadduq aap par

jaan bhī jī-jān se qurbān hai

dil kahāñ pahlū meñ jo ham deñ tumheñ

ye to ghar ik 'umr se vīrān hai

aql o hosh o sabr sab jaate rahe

haañ magar ik-adh muī sī jaan hai

vo bhī gar lenī hoñ to le jā.iye

ḳhair ye bhī aap kā ehsān hai

aan kar mil tū 'nazīr' apne se jaan

ab vo koī aan kā mehmān hai

kya ada kya naz hai kya aan hai

yan pari ka husn bhi hairan hai

hur bhi dekhe to ho jawe fida

aaj is aalam ka wo insan hai

us ke rang-e-sabz ki hai chin mein dhum

kyun na ho aaKHir ko hindostan hai

jaan-o-dil hum nazr ko lae hain aaj

lijiye ye dil hai aur ye jaan hai

dil bhi hai dil se tasadduq aap par

jaan bhi ji-jaan se qurban hai

dil kahan pahlu mein jo hum den tumhein

ye to ghar ek 'umr se viran hai

aql o hosh o sabr sab jate rahe

han magar ik-adh mui si jaan hai

wo bhi gar leni hon to le jaiye

KHair ye bhi aap ka ehsan hai

aan kar mil tu 'nazir' apne se jaan

ab wo koi aan ka mehman hai