kya bataen fasl-e-be-KHwabi yahan bota hai kaun

kyā batā.eñ fasl-e-be-ḳhvābī yahāñ botā hai kaun

jab dar-o-dīvār jalte hoñ to phir hotā hai kaun

tum to kahte the ki sab qaidī rihā.ī pā ga.e

phir pas-e-dīvār-e-zindāñ rāt-bhar rotā hai kaun

bas tirī bechārgī ham se nahīñ dekhī ga.ī

varna haath aa.ī huī daulat ko yuuñ khotā hai kaun

kaun ye pātāl se le kar ubhartā hai mujhe

itnī tahdārī se mujh par munkashif hotā hai kaun

koī be-tartībī-e-kirdār kī had hai 'salīm'

dāstāñ kis kī hai zeb-e-dāstāñ hotā hai kaun

kya bataen fasl-e-be-KHwabi yahan bota hai kaun

jab dar-o-diwar jalte hon to phir hota hai kaun

tum to kahte the ki sab qaidi rihai pa gae

phir pas-e-diwar-e-zindan raat-bhar rota hai kaun

bas teri bechaargi hum se nahin dekhi gai

warna hath aai hui daulat ko yun khota hai kaun

kaun ye patal se le kar ubharta hai mujhe

itni tahdari se mujh par munkashif hota hai kaun

koi be-tartibi-e-kirdar ki had hai 'salim'

dastan kis ki hai zeb-e-dastan hota hai kaun