kya bhala shaiKH-ji the dair mein thoDe patthar

kyā bhalā shaiḳh-jī the dair meñ thoḌe patthar

ki chale ka.aba ke tum dekhne roḌe patthar

ai basā kohna imārāt-e-maqābir jin ke

logoñ ne chob-o-chagal ke liye toḌe patthar

jaao ai shaiḳh o barahman haram-o-dair ko tum

bhaa.ī bezār haiñ ham ham ne ye chhoḌe patthar

kabhī dil-hā-e-butāñ tujh se pasījeñ ai ashk

to ye ham jāneñ ki bas tū ne nichoḌe patthar

na chire nok se nashtar ke ayāzam-billāh

koī ushshāq ke the chhātī ke phoḌe patthar

kos baiTheñ fuqarā ahl-e-duval ko to abhī

un ke hāthī hoñ pahāḌ aur ye ghoḌe patthar

gar sag-e-gursina le shuum ke matbaḳh kī baas

to bhalā haDDī kī jā kyā vo bhañboḌe patthar

na hinsā maiñ jo hañsāne se shab un kī to kahā

tujhe qurbān karūñ haa.e nigoḌe patthar

ek ġhazal aur sunā de hameñ 'inshā' har-chand

tū ne is meñ bhī kisī Dhab ke na chhoḌe patthar

kya bhala shaiKH-ji the dair mein thoDe patthar

ki chale kaba ke tum dekhne roDe patthar

ai basa kohna imaraat-e-maqabir jin ke

logon ne chob-o-chagal ke liye toDe patthar

jao ai shaiKH o barahman haram-o-dair ko tum

bhai bezar hain hum hum ne ye chhoDe patthar

kabhi dil-ha-e-butan tujh se pasijen ai ashk

to ye hum jaanen ki bas tu ne nichoDe patthar

na chire nok se nashtar ke ayazam-billah

koi ushshaq ke the chhati ke phoDe patthar

kos baiThen fuqara ahl-e-duwal ko to abhi

un ke hathi hon pahaD aur ye ghoDe patthar

gar sag-e-gursina le shum ke matbaKH ki bas

to bhala haDDi ki ja kya wo bhanboDe patthar

na hinsa main jo hansane se shab un ki to kaha

tujhe qurban karun hae nigoDe patthar

ek ghazal aur suna de hamein 'insha' har-chand

tu ne is mein bhi kisi Dhab ke na chhoDe patthar