kya daKHl kisi se maraz-e-ishq shifa ho

kyā daḳhl kisī se maraz-e-ishq shifā ho

mumkin hai ki is dard kī duniyā meñ davā ho

bāloñ kā ghuras rakhnā hai pagḌī hī meñ behtar

kyā fā.eda ik ḳhalq giraftār-e-balā ho

maġhrūr na rah hasti-e-mauhūm pe ġhāfil

yaañ aañkh jhapakte hī ḳhudā jāniye kyā ho

ai musht-e-ġhubār-e-tan-e-farsūda-e-āshiq

us kū meñ zamīñ-gīr hai giiv ab tū havā ho

gar charḳh pe jaave to shafaq hove mirā ḳhuuñ

var ḳhaak meñ pinhāñ ho to vaañ rañg-e-hinā ho

hai sub.h se kuchh aaj mire dil ko bashāshat

us kūche se qāsid to na ḳhat le ke chalā ho

kyā daur hai gar ruuh mirī ba.ad-e-fanā bhī

phirtī rahe kūche meñ tire bād-e-sabā ho

parda maiñ uThātā nahīñ zinhār kisī kā

is Dar se kahīñ tū hī na parde meñ chhupā ho

hai ā.īne meñ aks tirā terī hī sūrat

tū us pe fidā aur vo tere pe fidā ho

chalte hī tire baam pe aayā hai vo kāfir

kyuuñ itne qadam jald uThātā hai khaḌā ho

ai 'mus.hafī' us kūche se tū sar ko jhukā.e

kyā jaave hai kam-baḳht zarā rū-ba-qafā ho

kya daKHl kisi se maraz-e-ishq shifa ho

mumkin hai ki is dard ki duniya mein dawa ho

baalon ka ghuras rakhna hai pagDi hi mein behtar

kya faeda ek KHalq giraftar-e-bala ho

maghrur na rah hasti-e-mauhum pe ghafil

yan aankh jhapakte hi KHuda jaaniye kya ho

ai musht-e-ghubar-e-tan-e-farsuda-e-ashiq

us ku mein zamin-gir hai giw ab tu hawa ho

gar charKH pe jawe to shafaq howe mera KHun

war KHak mein pinhan ho to wan rang-e-hina ho

hai subh se kuchh aaj mere dil ko bashashat

us kuche se qasid to na KHat le ke chala ho

kya daur hai gar ruh meri baad-e-fana bhi

phirti rahe kuche mein tere baad-e-saba ho

parda main uThata nahin zinhaar kisi ka

is Dar se kahin tu hi na parde mein chhupa ho

hai aaine mein aks tera teri hi surat

tu us pe fida aur wo tere pe fida ho

chalte hi tere baam pe aaya hai wo kafir

kyun itne qadam jald uThata hai khaDa ho

ai 'mushafi' us kuche se tu sar ko jhukae

kya jawe hai kam-baKHt zara ru-ba-qafa ho