kya faqat talib-e-didar tha musa tera

kyā faqat tālib-e-dīdār thā muusā terā

vahī shaidā thā tirā maiñ nahīñ shaidā terā

dīda-e-shauq se be-vaj.h hai pardā terā

kis ne dekhā nahīñ in āñkhoñ se jalva terā

ḳhud nazākat pe na kyuuñ bojh ho pardā terā

kyā kisī aañkh ne dekhā nahīñ jalva terā

miT ga.ī shorish-e-tūfān-e-havādis ai mauj

ab vahī tū vahī bahtā huā dariyā terā

chain se shahr-e-ḳhamoshāñ meñ har ik sotā hai

aasrā sab ko hai ai vāda-e-fardā terā

manzilat ek kī bhī hogī na vaisī ba-ḳhudā

hashr meñ aa.egā jis shaan se rusvā terā

zindagī kahtī hai armāñ koī ab hai na ummīd

kab talak saath karūñ maiñ tan-e-tanhā terā

be-sabab merī ḳhamoshī nahīñ ai shāhid-e-husn

dāman-e-sabr se Dhañktā nahīñ pardā terā

yuuñ habāboñ kā na dil toḌ ḳhudā-rā ai mauj

inhīñ qatroñ ke to milne se hai dariyā terā

vahī rañgat vahī ḳhushbū vahī nāzuk-badanī

phuul ne naqsh utārā hai sarāpā terā

tujh se milne kā jo hai shauq to dar dar na phire

paañv toḌe hue baiThā rahe shaidā terā

ai gul aatī hai ḳhizāñ baaġh meñ Thahrā na mujhe

dekhūñ in āñkhoñ se utrā huā chehrā terā

kaash zāhid ruḳh-e-raushan se uThā leñ vo naqāb

phir to kuchh rind kī rindī hai na taqvā terā

apne mai-ḳhāne se ghabrā ke maiñ bāhar aayā

jab haram se koī niklā na shanāsā terā

us pe kyā zor bhalā jis pe ho us kā qaabū

chashm-e-shauq apnī sahī dil to hai shaidā terā

justujū shart hai mil jā.egā ziina bhī zarūr

sāmne hai nazar-e-shauq ke mukhḌā terā

vusa.at-e-qudrat-e-haq hogī na mahdūd kabhī

nahīñ milne kā sirā zulf-e-chalīpā terā

bazm-e-āḳhir hai taqāza na kar ai mahfil-e-shauq

ab kahāñ saaf bhalā sāġhar o sahbā terā

'shād' ġhazleñ nahīñ āyāt-e-zubūr in ko samajh

lahn-e-dā.ūd se kuchh kam nahīñ naġhmā terā

ab javānī kī umañgeñ na umañgoñ kī ḳhushī

'shād' ko hai faqat ai mauj sahārā terā

kya faqat talib-e-didar tha musa tera

wahi shaida tha tera main nahin shaida tera

dida-e-shauq se be-wajh hai parda tera

kis ne dekha nahin in aankhon se jalwa tera

KHud nazakat pe na kyun bojh ho parda tera

kya kisi aankh ne dekha nahin jalwa tera

miT gai shorish-e-tufan-e-hawadis ai mauj

ab wahi tu wahi bahta hua dariya tera

chain se shahr-e-KHamoshan mein har ek sota hai

aasra sab ko hai ai wada-e-farda tera

manzilat ek ki bhi hogi na waisi ba-KHuda

hashr mein aaega jis shan se ruswa tera

zindagi kahti hai arman koi ab hai na ummid

kab talak sath karun main tan-e-tanha tera

be-sabab meri KHamoshi nahin ai shahid-e-husn

daman-e-sabr se Dhankta nahin parda tera

yun hababon ka na dil toD KHuda-ra ai mauj

inhin qatron ke to milne se hai dariya tera

wahi rangat wahi KHushbu wahi nazuk-badani

phul ne naqsh utara hai sarapa tera

tujh se milne ka jo hai shauq to dar dar na phire

panw toDe hue baiTha rahe shaida tera

ai gul aati hai KHizan bagh mein Thahra na mujhe

dekhun in aankhon se utra hua chehra tera

kash zahid ruKH-e-raushan se uTha len wo naqab

phir to kuchh rind ki rindi hai na taqwa tera

apne mai-KHane se ghabra ke main bahar aaya

jab haram se koi nikla na shanasa tera

us pe kya zor bhala jis pe ho us ka qabu

chashm-e-shauq apni sahi dil to hai shaida tera

justuju shart hai mil jaega zina bhi zarur

samne hai nazar-e-shauq ke mukhDa tera

wusat-e-qudrat-e-haq hogi na mahdud kabhi

nahin milne ka sira zulf-e-chalipa tera

bazm-e-aKHir hai taqaza na kar ai mahfil-e-shauq

ab kahan saf bhala saghar o sahba tera

'shad' ghazlen nahin aayat-e-zubur in ko samajh

lahn-e-daud se kuchh kam nahin naghma tera

ab jawani ki umangen na umangon ki KHushi

'shad' ko hai faqat ai mauj sahaara tera