kya ho gaya hai gesu-e-KHamdar ko tere

kyā ho gayā hai gesū-e-ḳhamdār ko tire

āzād kar rahe haiñ giraftār ko tire

ab tū hai muddatoñ se shab-o-roz rū-ba-rū

kitne hī din guzar ga.e dīdār ko tire

kal raat chobdār samet aa ke le gayā

ik ġhol tarah-dār-e-sar-e-dār ko tire

ab itnī kund ho ga.ī dhaar ai yaqīñ tirī

ab roktā nahīñ hai koī vaar ko tire

ab rishta-e-marīz-o-masīhā huā hai ḳhvār

sab pesha-var samajhte haiñ bīmār ko tire

bāhar nikal ke aa dar-o-dīvār-e-zāt se

le jā.egī havā dar-o-dīvār ko tire

ai rañg us meñ suud hai terā ziyāñ nahīñ

ḳhushbū uḌā ke le ga.ī zangār ko tire

kya ho gaya hai gesu-e-KHamdar ko tere

aazad kar rahe hain giraftar ko tere

ab tu hai muddaton se shab-o-roz ru-ba-ru

kitne hi din guzar gae didar ko tere

kal raat chobdar samet aa ke le gaya

ek ghol tarah-dar-e-sar-e-dar ko tere

ab itni kund ho gai dhaar ai yaqin teri

ab rokta nahin hai koi war ko tere

ab rishta-e-mariz-o-masiha hua hai KHwar

sab pesha-war samajhte hain bimar ko tere

bahar nikal ke aa dar-o-diwar-e-zat se

le jaegi hawa dar-o-diwar ko tere

ai rang us mein sud hai tera ziyan nahin

KHushbu uDa ke le gai zangar ko tere