kya hota hai KHizan bahaar ke aane jaane se

kyā hotā hai ḳhizāñ bahār ke aane jaane se

sab mausam haiñ dil khilne aur dil murjhāne se

ek diyā kab rok sakā hai raat ko aane se

lekin dil kuchh sambhlā to ik diyā jalāne se

jo phūloñ aur kāñToñ kī pahchān nahīñ rakhtā

phuul nahīñ rukte ghar us kā bhī mahkāne se

jalte nazar nahīñ aa.e aur jal kar ḳhaak hue

duur kā rishta apnā bhī niklā parvāne se

kachchī umr meñ aur sāvan meñ kaise baaz aa.eñ

āñkheñ jagmag karne se āñchal lahrāne se

kitnā achchhā lagtā hai ik aam sā chehra bhī

sirf mohabbat-bharā tabassum lab par laane se

ga.e dinoñ meñ ronā bhī to kitnā sachchā thā

dil halkā ho jaatā thā jab ashk bahāne se

bhīgī raat kā sannāTā kartā hai vahī bāteñ

zaḳhm hare hote haiñ jo bāteñ yaad aane se

kya hota hai KHizan bahaar ke aane jaane se

sab mausam hain dil khilne aur dil murjhane se

ek diya kab rok saka hai raat ko aane se

lekin dil kuchh sambhla to ek diya jalane se

jo phulon aur kanTon ki pahchan nahin rakhta

phul nahin rukte ghar us ka bhi mahkane se

jalte nazar nahin aae aur jal kar KHak hue

dur ka rishta apna bhi nikla parwane se

kachchi umr mein aur sawan mein kaise baz aaen

aankhen jagmag karne se aanchal lahrane se

kitna achchha lagta hai ek aam sa chehra bhi

sirf mohabbat-bhara tabassum lab par lane se

gae dinon mein rona bhi to kitna sachcha tha

dil halka ho jata tha jab ashk bahane se

bhigi raat ka sannaTa karta hai wahi baaten

zaKHm hare hote hain jo baaten yaad aane se