kya hua dil-e-hazin gar KHushi guzar gai

kyā huā dil-e-hazīñ gar ḳhushī guzar ga.ī

ġham agar chalā gayā jins-e-mo'atabar ga.ī

ik tumhāre ishq se kis qadar zarar huā

dil gayā jigar gayā dūrbīñ nazar ga.ī

hasrat-e-mudām hī zindagī kī jaan hai

aadmī hī mar gayā aarzū jo mar ga.ī

dūsroñ pe munhasir nāḳhudā ke muntazir

dekh mujh nahīf kī naav paar utar ga.ī

dushmanī ko bhuul kar bekasī pe ro diyā

jab raqīb kī nazar merī qabr par ga.ī

fātiha ko haath uThā kar duā-e-maġhfirat

na.ash-e-'nādir'-e-hazīñ qabr meñ utar ga.ī

kya hua dil-e-hazin gar KHushi guzar gai

gham agar chala gaya jins-e-mo'atabar gai

ek tumhaare ishq se kis qadar zarar hua

dil gaya jigar gaya durbin nazar gai

hasrat-e-mudam hi zindagi ki jaan hai

aadmi hi mar gaya aarzu jo mar gai

dusron pe munhasir naKHuda ke muntazir

dekh mujh nahif ki naw par utar gai

dushmani ko bhul kar bekasi pe ro diya

jab raqib ki nazar meri qabr par gai

fatiha ko hath uTha kar dua-e-maghfirat

nash-e-'nadir'-e-hazin qabr mein utar gai