kya kasa-e-mai lijiye is bazm mein ai ham-nashin

kyā kāsa-e-mai lījiye is bazm meñ ai ham-nashīñ

daur-e-falak se kyā ḳhabar pahuñchegā lab tak yā nahīñ

ye kāsa-e-fīrozgūñ hai shīsha-bāz-e-pur-funūñ

jitne hiyal haiñ aur fusūñ sab us ke haiñ zer-e-nagīñ

ho e'timād us kā kise hai shīsha-bāzī yaad use

rakhtā hai shaad ik dam jise kartā hai phir andohgīñ

kal dāman-e-sahrā meñ ham guzre jo vaqt-e-sub.h-dam

ik kāsa-e-sar par alam aayā nazar apne vahīñ

bolā ba-fariyād-o-fuġhāñ kyā dekhtā hai o miyāñ

the ham bhī sar-bar-āsmāñ go ab to haiñ zer-e-zamīñ

gul-barg se nāzuk-badan sar paañv se rashk-e-chaman

zarrīñ o sīmīñ pairahan dilkash makānoñ ke makīñ

din raat naaz o nemateñ mah-tal.atoñ kī sohbateñ

aish-o-nashāt-o-ishrateñ saaqī qirāñ mutrib qarīñ

bāġh-o-chaman pesh-e-nazar bazm-e-tarab shām-o-sahar

har-sū ba-kasrat jalva-gar husn-e-butān-e-nāznīñ

ek āsmāñ ke daur se ik gardish-e-fil-faur se

ab sochiyegā ġhaur se dar-lahza-āñ dar-lahza-īñ

sunte hī jī tharrā gayā ruḳhsār par ashk aa gayā

dil ibratoñ se chhā gayā ḳhātir huī bas sahmagīñ

us meñ sar apnā nā-gahāñ har mū huā misl-e-zabāñ

bolā 'nazīr' aagah ho haañ man-nīz-roze ham-chunīñ

kya kasa-e-mai lijiye is bazm mein ai ham-nashin

daur-e-falak se kya KHabar pahunchega lab tak ya nahin

ye kasa-e-firozgun hai shisha-baz-e-pur-funun

jitne hiyal hain aur fusun sab us ke hain zer-e-nagin

ho e'timad us ka kise hai shisha-bazi yaad use

rakhta hai shad ek dam jise karta hai phir andohgin

kal daman-e-sahra mein hum guzre jo waqt-e-subh-dam

ek kasa-e-sar par alam aaya nazar apne wahin

bola ba-fariyaad-o-fughan kya dekhta hai o miyan

the hum bhi sar-bar-asman go ab to hain zer-e-zamin

gul-barg se nazuk-badan sar panw se rashk-e-chaman

zarrin o simin pairahan dilkash makanon ke makin

din raat naz o nematen mah-talaton ki sohbaten

aish-o-nashat-o-ishraten saqi qiran mutrib qarin

bagh-o-chaman pesh-e-nazar bazm-e-tarab sham-o-sahar

har-su ba-kasrat jalwa-gar husn-e-butan-e-naznin

ek aasman ke daur se ek gardish-e-fil-faur se

ab sochiyega ghaur se dar-lahza-an dar-lahza-in

sunte hi ji tharra gaya ruKHsar par ashk aa gaya

dil ibraton se chha gaya KHatir hui bas sahmagin

us mein sar apna na-gahan har mu hua misl-e-zaban

bola 'nazir' aagah ho han man-niz-roze ham-chunin