kya kahen tujhse hum wafa kya hai

kyā kaheñ tujh se ham vafā kyā hai

soch kuchh dil meñ pūchhtā kyā hai

dil hai ye yā ki aabla kyā hai

kyuuñ hai itnā bharā huā kyā hai

kaise kaise javāñ kiye barbād

ishq kyā shai hai ye balā kyā hai

dil ko denā thā de diyā zālim

aur ham ne tirā liyā kyā hai

gar raqābat tumheñ nahīñ mujh se

phir ye ā.īna dekhnā kyā hai

pahle rakh le tū apne dil par haath

phir mire ḳhat ko paḌh likhā kyā hai

ab vo āñkheñ nahīñ haiñ pahlī sī

sach kaho tum ko ho gayā kyā hai

shauq-e-āshiq-kushī bhalā hī sahī

rahm karnā bhī par burā kyā hai

kyā kaheñ ham burā ki ḳhū hī nahīñ

par kaho tum hī ye jafā kyā hai

jab ki gardan pe ḳhuuñ rahā us kī

naam mat lo ki ḳhūñ-bahā kyā hai

merī aur aarzū ko tū pūchhe

sochtā huuñ ki mudda.ā kyā hai

jaane kyā kyā huā hai rizq-e-ḳhāk

gul-o-lāla ko dekhtā kyā hai

dil ajab chiiz hai to tum se aziiz

rahne bhī do muāmla kyā hai

aage aage haiñ pāra-hā-e-jeb

mujh ko darkār rahnumā kyā hai

kam nigāhī bhī shart-e-husn hai par

dekh tū ham meñ ab rahā kyā hai

qatl hote rahe haiñ ham se pūchh

le ke shamshīr sochtā kyā hai

pī ga.ī ḳhuuñ zamīñ hazāroñ kī

muft phir shoḳhi-e-hinā kyā hai

donoñ aalam ko kyuuñ kiyā pāmāl

naqsh-e-pā par ye naqsh-e-pā kyā hai

ai 'qalaq' kyuuñ qalandarī chhoḌī

ye abā kyā hai ye qabā kyā hai

kya kahen tujh se hum wafa kya hai

soch kuchh dil mein puchhta kya hai

dil hai ye ya ki aabla kya hai

kyun hai itna bhara hua kya hai

kaise kaise jawan kiye barbaad

ishq kya shai hai ye bala kya hai

dil ko dena tha de diya zalim

aur hum ne tera liya kya hai

gar raqabat tumhein nahin mujh se

phir ye aaina dekhna kya hai

pahle rakh le tu apne dil par hath

phir mere KHat ko paDh likha kya hai

ab wo aankhen nahin hain pahli si

sach kaho tum ko ho gaya kya hai

shauq-e-ashiq-kushi bhala hi sahi

rahm karna bhi par bura kya hai

kya kahen hum bura ki KHu hi nahin

par kaho tum hi ye jafa kya hai

jab ki gardan pe KHun raha us ki

nam mat lo ki KHun-baha kya hai

meri aur aarzu ko tu puchhe

sochta hun ki muddaa kya hai

jaane kya kya hua hai rizq-e-KHak

gul-o-lala ko dekhta kya hai

dil ajab chiz hai to tum se aziz

rahne bhi do muamla kya hai

aage aage hain para-ha-e-jeb

mujh ko darkar rahnuma kya hai

kam nigahi bhi shart-e-husn hai par

dekh tu hum mein ab raha kya hai

qatl hote rahe hain hum se puchh

le ke shamshir sochta kya hai

pi gai KHun zamin hazaron ki

muft phir shoKHi-e-hina kya hai

donon aalam ko kyun kiya pamal

naqsh-e-pa par ye naqsh-e-pa kya hai

ai 'qalaq' kyun qalandari chhoDi

ye aba kya hai ye qaba kya hai