kya kahen tujhse ki kis kis ke karam hain hum hain

kyā kaheñ tujh se ki kis kis ke karam haiñ ham haiñ

kuchh tire kuchh tirī duniyā ke sitam haiñ ham haiñ

tū ne pūchhā hai to ahvāl batā dete haiñ

bas tirī yaad hai aur āḳhirī-dam haiñ ham haiñ

haa.e kyā jaan ke darvāza na kholā us ne

ham pukārā hī kiye yaar ye ham haiñ ham haiñ

kaise kaise vo kiyā kartā hai va.ade ham se

sub.h se shaam talak us ke bharam haiñ ham haiñ

sāqiyā ham se bhī derīna marāsim haiñ tire

ye jo mahrūm-e-qadah ġharq-e-alam haiñ ham haiñ

tū hī shīrāza-e-jāñ hai tū hī shīrāza-e-dil

jab talak ham pe tire jaur-o-sitam haiñ ham haiñ

jin ko majnūñ bhī kiyā kartā hai jhuk kar ādāb

garche is tarah ke āshiq baḌe kam haiñ ham haiñ

ye hamārā hai kisī aur kā lāsha to nahīñ

kis liye aañkh ke goshe tire nam haiñ ham haiñ

sāqiyā hifz-e-marātib kā zarā dhyān rahe

aisā lagtā hai ki me.aar se kam haiñ ham haiñ

ġhair ke dam se hai raunaq bhī charāġhāñ bhī 'vasī'

terī mahfil meñ agar sabz-qadam haiñ ham haiñ

kya kahen tujh se ki kis kis ke karam hain hum hain

kuchh tere kuchh teri duniya ke sitam hain hum hain

tu ne puchha hai to ahwal bata dete hain

bas teri yaad hai aur aaKHiri-dam hain hum hain

hae kya jaan ke darwaza na khola us ne

hum pukara hi kiye yar ye hum hain hum hain

kaise kaise wo kiya karta hai wade hum se

subh se sham talak us ke bharam hain hum hain

saqiya hum se bhi derina marasim hain tere

ye jo mahrum-e-qadah gharq-e-alam hain hum hain

tu hi shiraaza-e-jaan hai tu hi shiraaza-e-dil

jab talak hum pe tere jaur-o-sitam hain hum hain

jin ko majnun bhi kiya karta hai jhuk kar aadab

garche is tarah ke aashiq baDe kam hain hum hain

ye hamara hai kisi aur ka lasha to nahin

kis liye aankh ke goshe tere nam hain hum hain

saqiya hifz-e-maraatib ka zara dhyan rahe

aisa lagta hai ki mear se kam hain hum hain

ghair ke dam se hai raunaq bhi charaghan bhi 'wasi'

teri mahfil mein agar sabz-qadam hain hum hain