kya kahen tum se shab-e-gham hum pe kya kya ho gaya

kyā kaheñ tum se shab-e-ġham ham pe kyā kyā ho gayā

dil pighal kar bah gayā paanī kalejā ho gayā

zikr-e-chashm-e-mast se merā ḳharāba ho gayā

mai-kade tak bhī nahīñ pahuñchā ki rusvā ho gayā

mūjib-e-ḳhiffat hai 'ālam meñ tajarrud-peshgī

maiñ subuk-sār-e-mohabbat ho ke halkā ho gayā

jalva-e-ahl-e-safā hai tīra-baḳhtoñ par vabāl

din jahāñ niklā ki murġh-e-shappar andhā ho gayā

'arsh-e-ā'zam par rahe kyūñkar na majnūñ kā dimāġh

lailat-ul-me.arāj rañg-e-zulf-e-lailā ho gayā

ḳhvāb meñ bhī hai tasavvur shoḳh-chashmoñ kā hameñ

bistar-e-ārām apnā mirg-chhālā ho gayā

in parī-zādoñ ke kūche meñ tamāshe kī hai baat

jo tamāsha dekhne aayā tamāsha ho gayā

kya kahen tum se shab-e-gham hum pe kya kya ho gaya

dil pighal kar bah gaya pani kaleja ho gaya

zikr-e-chashm-e-mast se mera KHaraba ho gaya

mai-kade tak bhi nahin pahuncha ki ruswa ho gaya

mujib-e-KHiffat hai 'alam mein tajarrud-peshgi

main subuk-sar-e-mohabbat ho ke halka ho gaya

jalwa-e-ahl-e-safa hai tira-baKHton par wabaal

din jahan nikla ki murgh-e-shappar andha ho gaya

'arsh-e-a'zam par rahe kyunkar na majnun ka dimagh

lailat-ul-mearaj rang-e-zulf-e-laila ho gaya

KHwab mein bhi hai tasawwur shoKH-chashmon ka hamein

bistar-e-aram apna mirg-chhaala ho gaya

in pari-zadon ke kuche mein tamashe ki hai baat

jo tamasha dekhne aaya tamasha ho gaya