kya kahiye dastan-e-tamanna badal gai

kyā kahiye dāstān-e-tamannā badal ga.ī

un kī badalte hī duniyā badal ga.ī

ye daur-e-inqilāb hai ḳhud-noshiyoñ kā daur

har mai-kade meñ gardish-e-mīnā badal ga.ī

har phuul har kalī pe barastā hai ab lahū

rañgīnī-e-bahār-e-chaman kyā badal ga.ī

nikhrī huī bahār meñ chhāle haiñ ḳhūñ-chakāñ

apne qadam se qismat-e-sahrā badal ga.ī

paiham Tapak paḌe jo ba-hasrat huzūr-e-dost

in āñsuoñ se sharah-e-tamannā badal ga.ī

āzādī-e-junūñ kā yahī kyā ma.aal thā

zindāñ se dil-farebī-e-sahrā badal ga.ī

vo ḳhvāb-e-zindagī thā jo ham dekhte rahe

ai 'dil' khulī jab aañkh to duniyā badal ga.ī

kya kahiye dastan-e-tamanna badal gai

un ki badalte hi duniya badal gai

ye daur-e-inqilab hai KHud-noshiyon ka daur

har mai-kade mein gardish-e-mina badal gai

har phul har kali pe barasta hai ab lahu

rangini-e-bahaar-e-chaman kya badal gai

nikhri hui bahaar mein chhaale hain KHun-chakan

apne qadam se qismat-e-sahra badal gai

paiham Tapak paDe jo ba-hasrat huzur-e-dost

in aansuon se sharah-e-tamanna badal gai

aazadi-e-junun ka yahi kya maal tha

zindan se dil-farebi-e-sahra badal gai

wo KHwab-e-zindagi tha jo hum dekhte rahe

ai 'dil' khuli jab aankh to duniya badal gai