kya kahun kitna fuzun hai tere diwane ka dukh

kyā kahūñ kitnā fuzūñ hai tere dīvāne kā dukh

ik taraf jaane kā ġham hai ik taraf aane kā dukh

hai ajab be-rañgī-e-ahvāl mujh meñ maujzan

ne hī jiine kī talab hai ne hī mar jaane kā dukh

toḌ Daalā thā sabhī ko dard ke āzār ne

sah na paayā thā koī kirdār afsāne kā dukh

ḳhuun ro uThtī haiñ sab āñkheñ nigār-e-sub.h kī

bāñTtī hai shab kabhī jo ā.īna-ḳhāne kā dukh

sham.a bhī to ho rahī hotī hai har pal rā.egāñ

kyuuñ faqat ham ko nazar aatā hai parvāne kā dukh

sar paTaktī thiiñ musalsal mauj-hā-e-tishnagī

hoñT ke sāhil pe ḳhema-zan thā paimāne kā dukh

loTtā hai jab bhī siine par shanāsā.ī kā saañp

lahr uThtā hai badan meñ ek anjāne kā dukh

vaar detā huuñ maiñ 'sārim' apnī sab ābādiyāñ

mujh se dekhā hī nahīñ jaatā hai vīrāne kā dukh

kya kahun kitna fuzun hai tere diwane ka dukh

ek taraf jaane ka gham hai ek taraf aane ka dukh

hai ajab be-rangi-e-ahwal mujh mein maujzan

ne hi jine ki talab hai ne hi mar jaane ka dukh

toD Dala tha sabhi ko dard ke aazar ne

sah na paya tha koi kirdar afsane ka dukh

KHun ro uThti hain sab aankhen nigar-e-subh ki

banTti hai shab kabhi jo aaina-KHane ka dukh

shama bhi to ho rahi hoti hai har pal raegan

kyun faqat hum ko nazar aata hai parwane ka dukh

sar paTakti thin musalsal mauj-ha-e-tishnagi

honT ke sahil pe KHema-zan tha paimane ka dukh

loTta hai jab bhi sine par shanasai ka sanp

lahr uThta hai badan mein ek anjaane ka dukh

war deta hun main 'sarim' apni sab aabaadiyan

mujh se dekha hi nahin jata hai virane ka dukh