kya kahun kya kya gaya jab apna kashana gaya

kyā kahūñ kyā kyā gayā jab apnā kāshāna gayā

ḳhum gayā saaqī gayā aur ham se mai-ḳhāna gayā

ho ga.e kitne hī gum aql-o-ḳhirad kī raah meñ

manzil-e-maqsūd tak to sirf dīvāna gayā

gosha-e-tahzīb meñ bhī ghaat meñ sayyād hai

ab kabhī kā farq-e-ābādī-o-vīrāna gayā

aaj kī is zindagī ke tez-rau tūfān meñ

vaqt-e-zikr-e-sāġhar-o-mīnā-o-paimāna gayā

jiit le qalb-o-jigar qudrat kā ab vo vaqt hai

ab sanam ke jītne kā lutf-e-afsāna gayā

zindagī ne ab tarāshe nau-butān-e-dil-rubā

vo purānā tarz-e-sajda aur but-ḳhāna gayā

ham zamāne ke ruḳh-o-raftār kī bāteñ kareñ

ab vo lutf-e-garmī-e-raftār-e-jānānā gayā

āhan-o-tesha kī hai jhankār naġhma vaqt kā

ho gayā ḳhāmosh mutrib sher-e-rindāna gayā

ḳhair maqdam ham na.e dil se kareñ ab ai 'habīb'

raat guzrī sham.a ruḳhsat aur parvāna gayā

kya kahun kya kya gaya jab apna kashana gaya

KHum gaya saqi gaya aur hum se mai-KHana gaya

ho gae kitne hi gum aql-o-KHirad ki rah mein

manzil-e-maqsud tak to sirf diwana gaya

gosha-e-tahzib mein bhi ghat mein sayyaad hai

ab kabhi ka farq-e-abaadi-o-virana gaya

aaj ki is zindagi ke tez-rau tufan mein

waqt-e-zikr-e-saghar-o-mina-o-paimana gaya

jit le qalb-o-jigar qudrat ka ab wo waqt hai

ab sanam ke jitne ka lutf-e-afsana gaya

zindagi ne ab tarashe nau-butan-e-dil-ruba

wo purana tarz-e-sajda aur but-KHana gaya

hum zamane ke ruKH-o-raftar ki baaten karen

ab wo lutf-e-garmi-e-raftar-e-jaanana gaya

aahan-o-tesha ki hai jhankar naghma waqt ka

ho gaya KHamosh mutrib sher-e-rindana gaya

KHair maqdam hum nae dil se karen ab ai 'habib'

raat guzri shama ruKHsat aur parwana gaya