kya kahun tujhse meri jaan main shab ka ahwal

kyā kahūñ tujh se mirī jaan maiñ shab kā ahvāl

tujh pe raushan hai dil-e-vasl-talab kā ahvāl

huuñ maiñ ik āshiq-e-be-bāk o ḳharābātī o riñd

mujh se mat pūchh mire ilm-o-adab kā ahvāl

dil ko ḳhālī karūñ ro ro ke magar maiñ be-kas

kaun suntā hai mire rañj-o-ta.ab kā ahvāl

mahram-e-rāz nahīñ miltā koī dard hai ye

kyā tabīboñ se kahūñ ishq ke tab kā ahvāl

lutf hai sab se sazāvār-e-ġhazab ek huuñ maiñ

ḳhuub dekhā jo tire lutf o ġhazab kā ahvāl

ai miyāñ aaj to do baat mirī bhī sun le

kahā chāhūñ huuñ maiñ tujh se bhalā kab kā ahvāl

zor hai jaise ki nisbat namak o riish ke biich

maiñ hī samjhūñ tirī kaifiyyat-e-lab kā ahvāl

nahīñ dam mārne kī mujh ko tire aage majāl

haa.e suntā hai tū kis tarah se sab kā ahvāl

kyā koī ḳhush ho mire sher ko sun ke 'hasrat'

dard-e-dil hai ye nahīñ aish-o-tarab kā ahvāl

kya kahun tujh se meri jaan main shab ka ahwal

tujh pe raushan hai dil-e-wasl-talab ka ahwal

hun main ek aashiq-e-be-bak o KHarabaati o rind

mujh se mat puchh mere ilm-o-adab ka ahwal

dil ko KHali karun ro ro ke magar main be-kas

kaun sunta hai mere ranj-o-tab ka ahwal

mahram-e-raaz nahin milta koi dard hai ye

kya tabibon se kahun ishq ke tab ka ahwal

lutf hai sab se sazawar-e-ghazab ek hun main

KHub dekha jo tere lutf o ghazab ka ahwal

ai miyan aaj to do baat meri bhi sun le

kaha chahun hun main tujh se bhala kab ka ahwal

zor hai jaise ki nisbat namak o rish ke bich

main hi samjhun teri kaifiyyat-e-lab ka ahwal

nahin dam marne ki mujh ko tere aage majal

hae sunta hai tu kis tarah se sab ka ahwal

kya koi KHush ho mere sher ko sun ke 'hasrat'

dard-e-dil hai ye nahin aish-o-tarab ka ahwal