kya karun chup hai faza dard-ashna KHamosh hai

kyā karūñ chup hai fazā dard-āshnā ḳhāmosh hai

zulm hai rū-e-zamīñ par aur ḳhudā ḳhāmosh hai

rāste sunsān manzil duur rahbar sust-rau

dil-girafta rāh-rau bāñg-e-darā ḳhāmosh hai

'adl bahra hai gavāhān-e-tamāsha zar-ḳharīd

zulm goyā hai magar dārul-qazā ḳhāmosh hai

koī jugnū yā sitārā ho to kuchh ummīd ho

ab añdhere baḌh rahe haiñ aur diyā ḳhāmosh hai

kyā qayāmat hai ki chashm-e-yār hai be-surmagīñ

dast-o-pā be-rang haiñ rang-e-hinā ḳhāmosh hai

koī bhī ab barsar-e-paikār bātil se nahīñ

shaam ke bāzār chup haiñ karbalā ḳhāmosh hai

pesh-bandī ho rahī hai phir kisī tūfān kī

habs kā 'ālam hai aur āb-o-havā ḳhāmosh hai

kyā kahūñ 'rāhī' ki apnī ziist le aa.ī kahāñ

dard kā darmāñ nahīñ dast-e-du'ā ḳhāmosh hai

kya karun chup hai faza dard-ashna KHamosh hai

zulm hai ru-e-zamin par aur KHuda KHamosh hai

raste sunsan manzil dur rahbar sust-rau

dil-girafta rah-rau bang-e-dara KHamosh hai

'adl bahra hai gawahan-e-tamasha zar-KHarid

zulm goya hai magar darul-qaza KHamosh hai

koi jugnu ya sitara ho to kuchh ummid ho

ab andhere baDh rahe hain aur diya KHamosh hai

kya qayamat hai ki chashm-e-yar hai be-surmagin

dast-o-pa be-rang hain rang-e-hina KHamosh hai

koi bhi ab barsar-e-paikar baatil se nahin

sham ke bazar chup hain karbala KHamosh hai

pesh-bandi ho rahi hai phir kisi tufan ki

habs ka 'alam hai aur aab-o-hawa KHamosh hai

kya kahun 'rahi' ki apni zist le aai kahan

dard ka darman nahin dast-e-du'a KHamosh hai