kya khoya tha kya paya tha ab to ye bhi yaad nahin

kyā khoyā thā kyā paayā thā ab to ye bhī yaad nahīñ

kis se bichhḌe kaun milā thā ab to ye bhī yaad nahīñ

yaad hai bas itnā hī mujh ko maiñ ne peḌ pe likkhā thā

lekin kis kā naam likhā thā ab to ye bhī yaad nahīñ

halkā halkā yaad hai utnā kuchh na kuchh to TuuTā thā

dil thā yā phir ahd-e-vafā thā ab to ye bhī yaad nahīñ

sakhiyāñ sāthī khel khilaune apne liye to ḳhvāb hī the

bachpan apnā kab biitā thā ab to ye bhī yaad nahīñ

auroñ kī ḳhātir jiinā thā aur is jiine kī ḳhātir

ham ne kitnā zahr piyā thā ab to ye bhī yaad nahīñ

rahzan ban kar rahbar ne hī luuTā thā ik roz 'qamar'

kaun luTā thā kaun bachā thā ab to ye bhī yaad nahīñ

kya khoya tha kya paya tha ab to ye bhi yaad nahin

kis se bichhDe kaun mila tha ab to ye bhi yaad nahin

yaad hai bas itna hi mujh ko main ne peD pe likkha tha

lekin kis ka nam likha tha ab to ye bhi yaad nahin

halka halka yaad hai utna kuchh na kuchh to TuTa tha

dil tha ya phir ahd-e-wafa tha ab to ye bhi yaad nahin

sakhiyan sathi khel khilaune apne liye to KHwab hi the

bachpan apna kab bita tha ab to ye bhi yaad nahin

auron ki KHatir jina tha aur is jine ki KHatir

hum ne kitna zahr piya tha ab to ye bhi yaad nahin

rahzan ban kar rahbar ne hi luTa tha ek roz 'qamar'

kaun luTa tha kaun bacha tha ab to ye bhi yaad nahin