کیا کوئی کم ظرف ہے یا بے نوا ہے آئنہ

کیا کوئی کم ظرف ہے یا بے نوا ہے آئنہ

پھیر دیتا ہے وہی جو دیکھتا ہے آئنہ

اس کا ہونا یا نہ ہونا اس طرح مجھ پر کھلا

آئنے کے سامنے جیسے رکھا ہے آئنہ

چور دروازے سے گھس آئے بہت بے چہرہ لوگ

آئنہ خانے میں تنہا رہ گیا ہے آئنہ

مدتوں کے آشنا نے بھی نگاہیں پھیر لیں

چھوڑیئے جانے بھی دیجے آئنہ ہے آئنہ

میں سکندر عزم ہوں فردا پہ ہے میری نظر

غیر جو دیکھیں تو پیچھے دیکھتا ہے آئنہ

فکر کی صیقل سے گر مختارؔ ہو روشن ضمیر

آئنوں میں اس سے بہتر کون سا ہے آئنہ