kya kya hue hain hum pe sitam kuchh na puchhiye

kyā kyā hue haiñ ham pe sitam kuchh na pūchhiye

nāguftanī hai qissa-e-ġham kuchh na pūchhiye

dil kā to haal aap ko ham ne sunā diyā

jin mushkiloñ meñ aap haiñ ham kuchh na pūchhiye

guzre ba-ḳhair ka.aba-o-but-ḳhāna se to ham

ab sar kis āstāñ pe hai ḳham kuchh na pūchhiye

āñkhoñ meñ ashk lab pe fuġhāñ dil meñ iztirāb

kis mehrbāñ ke haiñ ye karam kuchh na pūchhiye

samjhā huā thā husn ko ham ne vafā-sarisht

niklā hai kis tarah ye bharam kuchh na pūchhiye

merī nazar meñ vaq.at-e-dair-o-haram hai kyā

ai sakinān-e-dair-o-haram kuchh na pūchhiye

le jā rahā hai zauq-e-tamāshā mujhe kahāñ

uThte haiñ kis taraf ko qadam kuchh na pūchhiye

pahuñchā hai aaj nāma-e-dildār to hameñ

kyā kyā huā hai zeb-e-raqam kuchh na pūchhiye

husn-e-suḳhan meñ lutf jo hai kyā batā.eñ ham

'sāhir' ke sher hī kī qasam kuchh na pūchhiye

kya kya hue hain hum pe sitam kuchh na puchhiye

naguftani hai qissa-e-gham kuchh na puchhiye

dil ka to haal aap ko hum ne suna diya

jin mushkilon mein aap hain hum kuchh na puchhiye

guzre ba-KHair kaba-o-but-KHana se to hum

ab sar kis aastan pe hai KHam kuchh na puchhiye

aankhon mein ashk lab pe fughan dil mein iztirab

kis mehrban ke hain ye karam kuchh na puchhiye

samjha hua tha husn ko hum ne wafa-sarisht

nikla hai kis tarah ye bharam kuchh na puchhiye

meri nazar mein waqat-e-dair-o-haram hai kya

ai sakinan-e-dair-o-haram kuchh na puchhiye

le ja raha hai zauq-e-tamasha mujhe kahan

uThte hain kis taraf ko qadam kuchh na puchhiye

pahuncha hai aaj nama-e-dildar to hamein

kya kya hua hai zeb-e-raqam kuchh na puchhiye

husn-e-suKHan mein lutf jo hai kya bataen hum

'sahir' ke sher hi ki qasam kuchh na puchhiye