kya kya maze se raat ki ahd-e-shabab mein

kyā kyā maze se raat kī ahd-e-shabāb meñ

chhoḌūñ na umr-e-rafta gar aa jaa.e ḳhvāb meñ

ik dil ke vāste ye phañse vo azaab meñ

rahte haiñ apnī zulf hī ke pech-o-tāb meñ

hai shauq-e-vasl tujh se lipaTtā huuñ baar baar

varna ye mastiyāñ to nahīñ thiiñ sharāb meñ

itnī na kiije jaane kī jaldī shab-e-visāl

dekhe haiñ maiñ ne kaam bigaḌte shitāb meñ

ho jaa.e chaak siina ki dil ghuT ke mar chalā

ai chāra-jū kisī ko phañsā mat azaab meñ

kar bahr o bar kī hasti-e-mauhūm par nazar

thoḌī sī ḳhaak Daal dī chashm-e-pur-āb meñ

tab qatl-gah meñ qatl-e-udū ko chale haiñ vo

merā lahū milā ke piyā jab sharāb meñ

kin mehnatoñ se vasl pe raazī hue haiñ vo

sau nāma-bar hue jo savāl o javāb meñ

aḳhtar-shumāriyoñ meñ nikaltā hai dam kahīñ

'taskīñ' tumhīñ ko daḳhl nahīñ hai hisāb meñ

kya kya maze se raat ki ahd-e-shabab mein

chhoDun na umr-e-rafta gar aa jae KHwab mein

ek dil ke waste ye phanse wo azab mein

rahte hain apni zulf hi ke pech-o-tab mein

hai shauq-e-wasl tujh se lipaTta hun bar bar

warna ye mastiyan to nahin thin sharab mein

itni na kije jaane ki jaldi shab-e-visal

dekhe hain main ne kaam bigaDte shitab mein

ho jae chaak sina ki dil ghuT ke mar chala

ai chaara-ju kisi ko phansa mat azab mein

kar bahr o bar ki hasti-e-mauhum par nazar

thoDi si KHak Dal di chashm-e-pur-ab mein

tab qatl-gah mein qatl-e-udu ko chale hain wo

mera lahu mila ke piya jab sharab mein

kin mehnaton se wasl pe raazi hue hain wo

sau nama-bar hue jo sawal o jawab mein

aKHtar-shumariyon mein nikalta hai dam kahin

'taskin' tumhin ko daKHl nahin hai hisab mein