kya laDke dilli ke hain ayyar aur naT-khaT

kyā laḌke dillī ke haiñ ayyār aur naT-khaT

dil leñ haiñ yuuñ ki hargiz hotī nahīñ hai aahaT

ham āshiqoñ ko marte kyā der kuchh lage hai

chaT jin ne dil pe khaa.ī vo ho gayā hai chaT-paT

dil hai jidhar ko ūdhar kuchh aag sī lagī thī

us pahlū ham jo leTe jal jal ga.ī hai karvaT

kaliyoñ ko tū ne chaT chaT ai bāġhbāñ jo toḌā

bulbul ke dil jigar ko zālim lagī hai kyā chaT

jī hī haTe na merā to us ko kyā karūñ maiñ

har-chand baiThtā huuñ majlis meñ us se haT haT

detī hai tuul bulbul kyā nāla-o-fuġhāñ ko

dil ke ulajhne se haiñ ye āshiqoñ kī phaT phaT

murde na the ham aise dariyā pe jab thā takiya

us ghaaT gaah o begah rahne lagā thā jamghaT

ruk ruk ke dil hamārā be-tāb kyuuñ na hove

kasrat se dard-o-ġham kī rahtā hai us pe jhurmuT

shab 'mīr' se mile ham ik vahm rah gayā hai

us ke ḳhayāl-e-mū meñ ab to gayā bahut laT

kya laDke dilli ke hain ayyar aur naT-khaT

dil len hain yun ki hargiz hoti nahin hai aahaT

hum aashiqon ko marte kya der kuchh lage hai

chaT jin ne dil pe khai wo ho gaya hai chaT-paT

dil hai jidhar ko udhar kuchh aag si lagi thi

us pahlu hum jo leTe jal jal gai hai karwaT

kaliyon ko tu ne chaT chaT ai baghban jo toDa

bulbul ke dil jigar ko zalim lagi hai kya chaT

ji hi haTe na mera to us ko kya karun main

har-chand baiThta hun majlis mein us se haT haT

deti hai tul bulbul kya nala-o-fughan ko

dil ke ulajhne se hain ye aashiqon ki phaT phaT

murde na the hum aise dariya pe jab tha takiya

us ghaT gah o begah rahne laga tha jamghaT

ruk ruk ke dil hamara be-tab kyun na howe

kasrat se dard-o-gham ki rahta hai us pe jhurmuT

shab 'mir' se mile hum ek wahm rah gaya hai

us ke KHayal-e-mu mein ab to gaya bahut laT