kya main jata hun sanam chhuT tere dar aur kahin

kyā maiñ jaatā huuñ sanam chhuT tire dar aur kahīñ

le qasam mujh se jo merā ho guzar aur kahīñ

raftagī kā hai ye aalam ki tire vaqt-e-ḳhirām

paañv jaate haiñ kahīñ aur kamar aur kahīñ

sub.h par vasl kī Thahrī hai shab-e-hijr tire

jāveñ jaldī se guzar chaar pahar aur kahīñ

vādī-e-qais meñ jo le ga.ī mujh ko vahshat

dil ke bahlāne kī jā thī na magar aur kahīñ

us ke kūche ko tū ai aah ġhanīmat hī samajh

sach to ye hai nahīñ itnā bhī asar aur kahīñ

ham haiñ aur ḳhosha-e-parvīñ kā tamāshā hama-shab

jā ke jhamkā.iye ye aqd-e-guhar aur kahīñ

lā-ubālī mirī dekhe hai tū ā.īna kahāñ

dil tirā aur kahīñ hai to nazar aur kahīñ

va.ada-e-vasl diyā iid kī shab ham ko sanam

aur tum jā ke hue shīr-o-shakar aur kahīñ

sāmne us ke lagūñ rone to jhuñjhlā ke kahe

yaañ se le jā.iye ye dīda-e-tar aur kahīñ

chaman-e-lāla-satāñ meñ mujhe jaane de sabā

chañge hoñge na mire dāġh-e-jigar aur kahīñ

tafraqa bād-e-ḳhizāñ ne ye chaman meñ Daalā

gul kahīñ aur paḌā hai to samar aur kahīñ

barg-o-bar ye tire kūche meñ to laatā hī nahīñ

jā ke biThlāveñg ḳhvāhish kā shajar aur kahīñ

aise ghabrā.e ki hālat na rahī kuchh baaqī

dekh aa.e jo use shams o qamar aur kahīñ

gar maiñ bad-nām huā us kī galī meñ to huā

yaaro ab yaañ se na jaave ye ḳhabar aur kahīñ

'mus.hafī' maiñ huuñ vo sar-gashta ki ḳhurshīd kī tarah

shaam gar aur kahīñ kī to sahar aur kahīñ

kya main jata hun sanam chhuT tere dar aur kahin

le qasam mujh se jo mera ho guzar aur kahin

raftagi ka hai ye aalam ki tere waqt-e-KHiram

panw jate hain kahin aur kamar aur kahin

subh par wasl ki Thahri hai shab-e-hijr tere

jawen jaldi se guzar chaar pahar aur kahin

wadi-e-qais mein jo le gai mujh ko wahshat

dil ke bahlane ki ja thi na magar aur kahin

us ke kuche ko tu ai aah ghanimat hi samajh

sach to ye hai nahin itna bhi asar aur kahin

hum hain aur KHosha-e-parwin ka tamasha hama-shab

ja ke jhamkaiye ye aqd-e-guhar aur kahin

la-ubaali meri dekhe hai tu aaina kahan

dil tera aur kahin hai to nazar aur kahin

wada-e-wasl diya id ki shab hum ko sanam

aur tum ja ke hue shir-o-shakar aur kahin

samne us ke lagun rone to jhunjhla ke kahe

yan se le jaiye ye dida-e-tar aur kahin

chaman-e-lala-satan mein mujhe jaane de saba

change honge na mere dagh-e-jigar aur kahin

tafraqa baad-e-KHizan ne ye chaman mein Dala

gul kahin aur paDa hai to samar aur kahin

barg-o-bar ye tere kuche mein to lata hi nahin

ja ke biThlaweng KHwahish ka shajar aur kahin

aise ghabrae ki haalat na rahi kuchh baqi

dekh aae jo use shams o qamar aur kahin

gar main bad-nam hua us ki gali mein to hua

yaro ab yan se na jawe ye KHabar aur kahin

'mushafi' main hun wo sar-gashta ki KHurshid ki tarah

sham gar aur kahin ki to sahar aur kahin