kya mila qais ko gard-e-rah-e-sahra ho kar

kyā milā qais ko gard-e-rah-e-sahrā ho kar

rah gayā hotā ġhubār-e-dar-e-lailā ho kar

yaad aate haiñ chaman meñ jo kisī ke aariz

gul khaTakte haiñ mirī āñkhoñ meñ kāñTā ho kar

pahle kyā thā jo kiyā karte the tārīf mirī

ab huā kyā jo burā ho gayā achchhā ho kar

dil meñ rakh gard-e-kudūrat na bahut ai kam-bīñ

kahīñ rah jaa.e na ye aa.ina andhā ho kar

hijr meñ yād-e-mizha aur bhī taḌpātī hai

qalb-e-bismil meñ khaTaktī hai ye kāñTā ho kar

nāla-e-garm ne tāsīr ajab dikhlā.ī

rah gayā misl-e-charāġh aap meñ ThanDā ho kar

yaar ke ruḳh kī sabāhat kā tasavvur shab-e-hijr

aayā taskīñ ko mirī nuur kā taḌkā ho kar

dil se kahtā hai ġham-e-ulfat-e-jānāñ dam-e-marg

tum to duniyā se chale maiñ rahūñ kis kā ho kar

chhoḌnā ai ġham-e-ulfat na kabhī saath us kā

kahīñ ghabrā.e mirā dil na akelā ho kar

aa.e to vasl kā din ho to kahīñ bos-o-kanār

sab nikal jā.egī sharm un kī pasīnā ho kar

jism-e-anvar kī latāfat kī sanā kyā kiije

jāma-e-yār na utrā kabhī mailā ho kar

dahr kī dekhte haiñ past-o-buland ai 'zebā'

karbalā jā.eñge is vāste bat.hā ho kar

kya mila qais ko gard-e-rah-e-sahra ho kar

rah gaya hota ghubar-e-dar-e-laila ho kar

yaad aate hain chaman mein jo kisi ke aariz

gul khaTakte hain meri aankhon mein kanTa ho kar

pahle kya tha jo kiya karte the tarif meri

ab hua kya jo bura ho gaya achchha ho kar

dil mein rakh gard-e-kudurat na bahut ai kam-bin

kahin rah jae na ye aaina andha ho kar

hijr mein yaad-e-mizha aur bhi taDpati hai

qalb-e-bismil mein khaTakti hai ye kanTa ho kar

nala-e-garm ne tasir ajab dikhlai

rah gaya misl-e-charagh aap mein ThanDa ho kar

yar ke ruKH ki sabahat ka tasawwur shab-e-hijr

aaya taskin ko meri nur ka taDka ho kar

dil se kahta hai gham-e-ulfat-e-jaanan dam-e-marg

tum to duniya se chale main rahun kis ka ho kar

chhoDna ai gham-e-ulfat na kabhi sath us ka

kahin ghabrae mera dil na akela ho kar

aae to wasl ka din ho to kahin bos-o-kanar

sab nikal jaegi sharm un ki pasina ho kar

jism-e-anwar ki latafat ki sana kya kije

jama-e-yar na utra kabhi maila ho kar

dahr ki dekhte hain past-o-buland ai 'zeba'

karbala jaenge is waste batha ho kar