kya puchho ho kya kahiye miyan dil ne bhi kya kaam kiya

kyā pūchho ho kyā kahiye miyāñ dil ne bhī kyā kaam kiyā

ishq kiyā nākām rahā āḳhir ko kaam tamām kiyā

ijz kiyā sau us mufsid ne qadr hamārī ye kuchh kī

tyorī chaḌhā.ī ġhussa kiyā jab ham ne jhuk ke salām kiyā

kahne kī bhī likhne kī bhī ham to qasam khā baiThe the

āḳhir dil kī betābi se ḳhat bhejā paiġhām kiyā

ishq kī tohmat jab na huī thī kaahe ko shohrat aisī thī

shahr meñ ab rusvā haiñ ya.anī badnāmī se kaam kiyā

registāñ meñ jā ke raheñ yā sangistāñ meñ ham jogī

raat huī jis jāgah ham ko ham ne vahīñ bisrām kiyā

ḳhatt-o-kitābat likhnā us ko tark kiyā thā is hī liye

harf-o-suḳhan se Tapkā lohū ab jo kuchh irqām kiyā

talḳh us kā to shahd-o-shakar hai zauq meñ ham nākāmoñ ke

logoñ meñ lekin poch kahā ye lutf-e-be-hangām kiyā

jaise koī jahāñ se jaave ruḳhsat is hasrat se hue

us kūche se nikal kar ham ne rū-ba-qafā har gaam kiyā

'mīr' jo un ne muñh ko idhar kar ham se koī baat kahī

lutf kiyā ehsān kiyā in.aam kiyā ikrām kiyā

kya puchho ho kya kahiye miyan dil ne bhi kya kaam kiya

ishq kiya nakaam raha aaKHir ko kaam tamam kiya

ijz kiya sau us mufsid ne qadr hamari ye kuchh ki

tyori chaDhai ghussa kiya jab hum ne jhuk ke salam kiya

kahne ki bhi likhne ki bhi hum to qasam kha baiThe the

aaKHir dil ki betabi se KHat bheja paigham kiya

ishq ki tohmat jab na hui thi kahe ko shohrat aisi thi

shahr mein ab ruswa hain yani badnami se kaam kiya

registan mein ja ke rahen ya sangistan mein hum jogi

raat hui jis jagah hum ko hum ne wahin bisram kiya

KHatt-o-kitabat likhna us ko tark kiya tha is hi liye

harf-o-suKHan se Tapka lohu ab jo kuchh irqam kiya

talKH us ka to shahd-o-shakar hai zauq mein hum nakaamon ke

logon mein lekin poch kaha ye lutf-e-be-hangam kiya

jaise koi jahan se jawe ruKHsat is hasrat se hue

us kuche se nikal kar hum ne ru-ba-qafa har gam kiya

'mir' jo un ne munh ko idhar kar hum se koi baat kahi

lutf kiya ehsan kiya inam kiya ikram kiya