kya rup dosti ka kya rang dushmani ka

kyā ruup dostī kā kyā rañg dushmanī kā

koī nahīñ jahāñ meñ koī nahīñ kisī kā

ik tinkā āshiyāna ik rāgnī asāsa

ik mausam-e-bahārāñ mehmān do ghaḌī kā

āḳhir koī kinārā is sail-e-be-karāñ kā

āḳhir koī mudāvā is dard-e-zindagī kā

merī siyāh shab ne ik umr aarzū kī

larze kabhī ufuq par taagā sā raushnī kā

shāyad idhar se guzre phir bhī tirā safīna

baiThā huā huuñ sāhil par nai-ba-lab kabhī kā

is iltifāt par hoñ laakh iltifāt qurbāñ

mujh se kabhī na pherā ruḳh tū ne be-ruḳhī kā

ab merī zindagī meñ aañsū haiñ aur na aaheñ

lekin ye ek mīThā mīThā sā rog jī kā

o muskurāte taaro o khilkhilāte phūlo

koī ilaaj merī āshufta-ḳhātirī kā

kya rup dosti ka kya rang dushmani ka

koi nahin jahan mein koi nahin kisi ka

ek tinka aashiyana ek ragni asasa

ek mausam-e-bahaaran mehman do ghaDi ka

aaKHir koi kinara is sail-e-be-karan ka

aaKHir koi mudawa is dard-e-zindagi ka

meri siyah shab ne ek umr aarzu ki

larze kabhi ufuq par taga sa raushni ka

shayad idhar se guzre phir bhi tera safina

baiTha hua hun sahil par nai-ba-lab kabhi ka

is iltifat par hon lakh iltifat qurban

mujh se kabhi na phera ruKH tu ne be-ruKHi ka

ab meri zindagi mein aansu hain aur na aahen

lekin ye ek miTha miTha sa rog ji ka

o muskuraate taro o khilkhilate phulo

koi ilaj meri aashufta-KHatiri ka