kya shab-e-gham meri basar na hui

kyā shab-e-ġham mirī basar na huī

tum na aa.e to kyā sahar na huī

shām-e-ġham kī kabhī sahar na huī

jo duā kī vo kārgar na huī

shab-e-furqat tavīl thī jitnī

aur koī raat is qadar na huī

thī nigāh-e-karam raqīboñ par

umr bhar vo kabhī idhar na huī

kyā kahūñ apnī nā-murādī-e-dil

ki mohabbat bhī mo'atabar na huī

mirī barbādiyoñ ke qissoñ par

kab zamāne kī aañkh tar na huī

shab-e-va.ada vo aa ga.e 'nāzī'

shukr hai kuchh agar-magar na huī

kya shab-e-gham meri basar na hui

tum na aae to kya sahar na hui

sham-e-gham ki kabhi sahar na hui

jo dua ki wo kargar na hui

shab-e-furqat tawil thi jitni

aur koi raat is qadar na hui

thi nigah-e-karam raqibon par

umr bhar wo kabhi idhar na hui

kya kahun apni na-muradi-e-dil

ki mohabbat bhi mo'atabar na hui

meri barbaadiyon ke qisson par

kab zamane ki aankh tar na hui

shab-e-wada wo aa gae 'nazi'

shukr hai kuchh agar-magar na hui