kya sitam hai ki sitam hum pe wo kar jate hain

kyā sitam hai ki sitam ham pe vo kar jaate haiñ

apne saa.e se jo tanhā.ī meñ Dar jaate haiñ

lauT ke aanā hī paḌtā hai unheñ saiñkaḌoñ baar

tere kūche se jo ik baar guzar jaate haiñ

ġham ke māroñ ko bhī aatī hai kabhī ḳhud pe hañsī

kabhī sahrā meñ bhī kuchh phuul bikhar jaate haiñ

yaad rah jaate haiñ ahbāb ke kuchh lutf-o-karam

din musībat ke bahar-hāl guzar jaate haiñ

pārsā.ī na jatāo ki ye hai mai-ḳhāna

achchhe achchhe yahāñ shīshe meñ utar jaate haiñ

tum pashemāñ na hoñ tum par koī ilzām nahīñ

marne vaale kabhī be-maut bhī mar jaate haiñ

merī bigḌī huī taqdīr bane yā na bane

un ke bikhre hue gesū to sañvar jaate haiñ

dafn ho kar bhī kahīñ dabte haiñ armān hasīñ

ban ke gul sīna-e-gulshan pe ubhar jaate haiñ

jaan de dete haiñ jo baat ke hote haiñ dhanī

aur hoñge jo zabāñ de ke mukar jaate haiñ

le ke ummīd yahāñ aa.e the kyā kyā 'raunaq'

aap kī bazm se kyā le ke asar jaate haiñ

kya sitam hai ki sitam hum pe wo kar jate hain

apne sae se jo tanhai mein Dar jate hain

lauT ke aana hi paDta hai unhen sainkaDon bar

tere kuche se jo ek bar guzar jate hain

gham ke maron ko bhi aati hai kabhi KHud pe hansi

kabhi sahra mein bhi kuchh phul bikhar jate hain

yaad rah jate hain ahbab ke kuchh lutf-o-karam

din musibat ke bahar-haal guzar jate hain

parsai na jatao ki ye hai mai-KHana

achchhe achchhe yahan shishe mein utar jate hain

tum pasheman na hon tum par koi ilzam nahin

marne wale kabhi be-maut bhi mar jate hain

meri bigDi hui taqdir bane ya na bane

un ke bikhre hue gesu to sanwar jate hain

dafn ho kar bhi kahin dabte hain arman hasin

ban ke gul sina-e-gulshan pe ubhar jate hain

jaan de dete hain jo baat ke hote hain dhani

aur honge jo zaban de ke mukar jate hain

le ke ummid yahan aae the kya kya 'raunaq'

aap ki bazm se kya le ke asar jate hain