kya sitam kar gai ai dost teri chashm-e-karam

kyā sitam kar ga.ī ai dost tirī chashm-e-karam

jaise tere nahīñ duniyā ke gunahgār haiñ ham

koī aalam ho bahar-hāl guzar jaatā hai

ham na sargashta-e-rāhat haiñ na āshufta-e-ġham

tirī zulfoñ kī ghanī chhāñv bahut duur sahī

jāda-paimā haiñ havādis kī kaḌī dhuup meñ ham

nik.hat-e-gul se kuchh is tarah mulāqāt huī

yaad aayā tirī begāna-vashī kā aalam

ham haiñ tūfān-e-malāmat hai galī hai terī

husn-e-taqdīr se hote haiñ ye hālāt baham

le gayā ishq kisī shāhid-e-nādīda tak

muddatoñ zauq-e-parastish ne tarāshe the sanam

ham ne har uqda-e-dushvār kā muñh chuum liyā

kitne dilkash haiñ tirī zulf-e-girah-gīr ke ḳham

kū-e-qātil hī sahī manzil-e-rāhat na sahī

thak ke baiThe haiñ ki aate haiñ bahut duur se ham

kū-e-jānāñ meñ kahīñ aaj to ham bhī the 'ravish'

shukr hai ham ko na pahchān sake dair o haram

kya sitam kar gai ai dost teri chashm-e-karam

jaise tere nahin duniya ke gunahgar hain hum

koi aalam ho bahar-haal guzar jata hai

hum na sargashta-e-rahat hain na aashufta-e-gham

teri zulfon ki ghani chhanw bahut dur sahi

jada-paima hain hawadis ki kaDi dhup mein hum

nikhat-e-gul se kuchh is tarah mulaqat hui

yaad aaya teri begana-washi ka aalam

hum hain tufan-e-malamat hai gali hai teri

husn-e-taqdir se hote hain ye haalat baham

le gaya ishq kisi shahid-e-nadida tak

muddaton zauq-e-parastish ne tarashe the sanam

hum ne har uqda-e-dushwar ka munh chum liya

kitne dilkash hain teri zulf-e-girah-gir ke KHam

ku-e-qatil hi sahi manzil-e-rahat na sahi

thak ke baiThe hain ki aate hain bahut dur se hum

ku-e-jaanan mein kahin aaj to hum bhi the 'rawish'

shukr hai hum ko na pahchan sake dair o haram