kya yahi us ka mudawa na hua

kyā yahī us kā mudāvā na huā

ek bīmār jo achchhā na huā

chaar tinke hī sahī jal to ga.e

kyā mire dam se ujālā na huā

un kī qurbat hī sahī hāsil-e-zīst

ye to andāz-e-tamannā na huā

hai tamannā-e-tulū-e-ḳhurshīd

aur agar phir bhī saverā na huā

pursish-e-ġham to huī thī lekin

ham se iz.hār-e-tamannā na huā

lazzat-e-dard-e-mohabbat ke sabab

ham ko marnā bhī gavārā na huā

ġham ne vo bazm sajā.ī 'ehsās'

maiñ zarā der ko tanhā na huā

kya yahi us ka mudawa na hua

ek bimar jo achchha na hua

chaar tinke hi sahi jal to gae

kya mere dam se ujala na hua

un ki qurbat hi sahi hasil-e-zist

ye to andaz-e-tamanna na hua

hai tamanna-e-tulu-e-KHurshid

aur agar phir bhi sawera na hua

pursish-e-gham to hui thi lekin

hum se izhaar-e-tamanna na hua

lazzat-e-dard-e-mohabbat ke sabab

hum ko marna bhi gawara na hua

gham ne wo bazm sajai 'ehsas'

main zara der ko tanha na hua